புதுடெல்லி, 09 மே (ஹி.ச.)

நோபல் பரிசு பெற்ற கவிஞர் ரவீந்திரநாத் தாகூரின் பிறந்த நாள் மேற்கு வங்க நாட்காட்டியில் பைசாக் மாதத்தின் 25-ஆம் நாளான பொசிஷே பைசாக்கில் கொண்டாடப்படுகிறது. தாகூரின் பிறந்த நாளைக் குறிக்கும் இந்த நாள் ரவீந்திர ஜெயந்தியாகக் கொண்டாடப்படுகிறது.

மேற்கு வங்கத்திலும், உலகெங்கிலும் உள்ள வங்காள சமூகத்தினருக்கும் பொசிஷே பைசாக் ஒரு முக்கியமான கலாச்சார நிகழ்வாகும்.

2026 சட்டமன்றத் தேர்தலில் அமோக வெற்றி பெற்றதைத் தொடர்ந்து, மேற்கு வங்கத்தில் பாரதிய ஜனதா கட்சி ஆட்சி அமைத்த முதல் நாளில் இந்த அஞ்சலி இடம்பெற்றது.

அம்மாநிலத்தில் 207 இடங்களைக் கைப்பற்றிய பாஜக, திரிணாமுல் காங்கிரசின் 15 ஆண்டு கால ஆட்சிக்கு முற்றுப்புள்ளி வைத்தது.

மேற்கு வங்கத்தின் முதல் பாஜக முதலமைச்சராக மூத்த தலைவர் சுவேந்து அதிகாரி இன்று காலை 10 மணிக்கு கொல்கத்தா பிரிகேட் பரேட் மைதானத்தில் பதவியேற்றார்.

இது தொடர்பாக எக்ஸ் தளத்தில் பிரதமர் மோடி இன்று பகிர்ந்த செய்தியில் கூறியதாவது:

பொசிஷே பைசாக் எனும் இந்த சிறப்பான நாளில், குருதேவ் தாகூருக்கு நமது மனமார்ந்த அஞ்சலிகளை செலுத்துகிறோம்.

குருதேவ் தாகூர் அசாதாரண திறமை கொண்ட எழுத்தாளர், சிந்தனையாளர் மற்றும் கவிஞர் ஆவார். ஒரு தலைசிறந்த தத்துவஞானி, கல்வியாளர், கலைஞர் மற்றும் இந்திய நாகரிக ஆன்மாவின் காலத்தால் அழியாத குரலாக அவர் தனது முத்திரையைப் பதித்தார். மனிதகுலத்தின் ஆழமான உணர்வுகளுக்கும், நமது கலாச்சாரத்தின் உயர்ந்த இலட்சியங்களுக்கும் அவர் வடிவம் கொடுத்தார். புதிய சிந்தனை, படைப்பாற்றல் மற்றும் கலாச்சார நம்பிக்கையால் நமது சமூகத்தை அவர் வளப்படுத்தினார்.

அவரை ஆழ்ந்த மரியாதையுடனும் நன்றியுடனும் நினைவுகூர்கிறோம். அவரது சிந்தனைகள் தொடர்ந்து மனங்களை ஒளிரச் செய்து, நமது முயற்சிகளுக்கு வழிகாட்டட்டும்.

என்று பிரதமர் மோடி கூறியுள்ளார்.

Hindusthan Samachar / vidya.b