மேட்டூர், 11 ஜூன் (ஹி.ச.)

டெல்டா மாவட்டங்களின் குறுவை சாகுபடிக்காக ஆண்டுதோறும் ஜூன் 12-ஆம் தேதி சேலம் மாவட்டத்தில் உள்ள மேட்டூர் அணையில் இருந்து தண்ணீர் திறந்து விடுவது வழக்கமான நடைமுறையாகும்.

ஆனால் இந்த ஆண்டு அந்த வழக்கமான நடைமுறை மாற்றப்பட்டுள்ளது. நீர்வளத்துறை அதிகாரிகள் தெரிவித்துள்ள தகவலின்படி, நாளை ஜூன் 12-ஆம் தேதி அணையில் இருந்து பாசனத்திற்காக தண்ணீர் திறக்கப்பட மாட்டாது என உறுதி செய்யப்பட்டுள்ளது.

பொதுவாக ஜூன் 12-ஆம் தேதி மேட்டூர் அணை திறக்கப்பட்டு, காவிரி டெல்டா மாவட்டங்களான தஞ்சாவூர், திருவாரூர், நாகப்பட்டினம், மயிலாடுதுறை உள்ளிட்ட பகுதிகளின் பாசனத் தேவைக்கு நீர் வழங்கப்படும். இதன் மூலம் குறுவை சாகுபடி பணிகள் தொடங்கப்படுவது வழக்கம்.

இந்த ஆண்டு நீர் திறப்பு ஒத்திவைக்கப்பட்டதற்கான காரணம் குறித்து நீர்வளத்துறை தரப்பில் இருந்து அதிகாரப்பூர்வ விளக்கம் எதிர்பார்க்கப்படுகிறது.

அணையின் தற்போதைய நீர் இருப்பு மற்றும் கர்நாடக அணைகளில் இருந்து வரும் நீர்வரத்து ஆகியவை கருத்தில் கொள்ளப்பட்டு இந்த முடிவு எடுக்கப்பட்டிருக்கலாம் என தெரிகிறது.

டெல்டா விவசாயிகள் மத்தியில் இந்த அறிவிப்பு கவலையை ஏற்படுத்தியுள்ள நிலையில், அணையில் இருந்து நீர் திறக்கப்படும் தேதி குறித்த அடுத்தகட்ட அறிவிப்புக்காக விவசாயிகள் காத்திருக்கின்றனர்.

Hindusthan Samachar / vidya.b