திருநெல்வேலி , 13 ஜூன் (ஹி.ச.)

திருநெல்வேலி மாவட்டத்தில் உள்ள புகழ்பெற்ற சுற்றுலாத் தலமான மணிமுத்தாறு அருவியில் சுற்றுலாப் பயணிகள் குளிப்பதற்கு விதிக்கப்பட்ட தடை தொடர்ந்து இன்று பத்தாவது நாளாக நீடித்து வருவதாக வனத்துறை அதிகாரிகள் தெரிவித்துள்ளனர்.

மேற்குத் தொடர்ச்சி மலைப் பகுதியில் பெய்து வரும் தொடர் கனமழையின் காரணமாக மணிமுத்தாறு அருவிக்கு வரும் நீர்வரத்து வழக்கத்தைவிட கணிசமாக அதிகரித்துள்ளது. இதனால் அருவியில் நீரின் வேகமும், ஆழமும் அதிகரித்து காணப்படுகிறது.

இந்நிலையில் சுற்றுலாப் பயணிகளின் உயிர் மற்றும் உடைமைப் பாதுகாப்பைக் கருத்தில் கொண்டு, முன்னெச்சரிக்கை நடவடிக்கையாக அருவியில் குளிப்பதற்கு வனத்துறையினர் தற்காலிக தடை விதித்துள்ளனர்.

கடந்த பத்து நாட்களாக இந்தத் தடை அமலில் இருந்து வருகிறது.

அருவிப் பகுதிக்கு வருகை தரும் சுற்றுலாப் பயணிகள், அருவியை தூரத்தில் இருந்து மட்டுமே கண்டு ரசிக்க அனுமதிக்கப்படுகின்றனர்.

அருவிக்கு அருகில் செல்வதற்கும், நீரில் இறங்கிக் குளிப்பதற்கும் வனத்துறை காவலர்கள் கண்காணிப்பு பணியில் ஈடுபட்டு தடுத்து வருகின்றனர்.

நீர்வரத்து இயல்பு நிலைக்குத் திரும்பிய பிறகு, வனத்துறை உயர் அதிகாரிகளின் ஆய்வுக்குப் பின்னர் மீண்டும் அருவியில் குளிக்க அனுமதி வழங்கப்படும் என வனத்துறை வட்டாரங்கள் தெரிவிக்கின்றன.

எனவே, சுற்றுலாப் பயணிகள் வனத்துறையின் அறிவிப்பு வரும் வரை ஒத்துழைப்பு நல்குமாறு கேட்டுக்கொள்ளப்பட்டுள்ளது.

தொடர் மழை காரணமாக மணிமுத்தாறு அணையின் நீர்மட்டமும் வேகமாக உயர்ந்து வருவது குறிப்பிடத்தக்கது.

Hindusthan Samachar / vidya.b