காகினாடா, 14 ஜூன் (ஹி.ச.)

காகினாடா மாவட்டம் தூனி அருகே உள்ள சி.எச். அகரஹாரம் பகுதியில் சிறுமி ஞானேஸ்வரி காணாமல் போன சம்பவம் பரபரப்பை ஏற்படுத்தியுள்ளது.

சம்பவம் நடைபெற்ற நாள் முதல் காவல்துறை மற்றும் மீட்பு குழுக்கள் இணைந்து தீவிர தேடுதல் நடவடிக்கைகளை மேற்கொண்டு வருகின்றன.

இந்த விவகாரம் தொடர்பாக துணை முதல்வர் பவன் கல்யாண் காவல்துறை உயர் அதிகாரிகளுடன் இன்று தொலைபேசியில் ஆலோசனை நடத்தி, தேடுதல் பணிகளை மேலும் வேகப்படுத்த உத்தரவிட்டுள்ளார்.

தேவையெனில் கூடுதல் படைகள் மற்றும் நிபுணர் குழுக்களை உடனடியாக பயன்படுத்த வேண்டும் என்றும் அவர் அறிவுறுத்தியுள்ளார்.

இதையடுத்து, மாவட்ட காவல்துறை மற்றும் State Disaster Response Force இணைந்து சுமார் 400-க்கும் மேற்பட்ட பணியாளர்களுடன் தேடுதல் பணியில் ஈடுபட்டுள்ளனர். அடர்ந்த வனப்பகுதிகளில் தீவிரமாக தேடுவதற்காக National Disaster Response Force உதவியும் பெற ஆலோசிக்கப்பட்டுள்ளது.

மேலும், ட்ரோன்கள் மற்றும் சிசிடிவி காட்சிகள் மூலம் பல்வேறு கோணங்களில் விசாரணை நடைபெற்று வருகிறது.

இந்நிலையில், சிறுமியுடன் சம்பவ நாளில் காணாமல் போய் பின்னர் திரும்பிய செல்ல நாயை போலீசார் முக்கிய தடயமாக கருதி அதில் ஜிபிஎஸ் கருவி பொருத்தி கண்காணித்தனர். அந்த நாய் சுமார் 8 கிலோமீட்டர் தூரம் வயல்வெளி மற்றும் வனப்பகுதிகளில் சுற்றியதாக தெரியவந்தது.

ஆனால் சில நேரத்திலேயே அது உடல்நலக் குறைவால் உயிரிழந்தது.

இதனால் முக்கிய தடயமாக கருதப்பட்ட அந்த நாய் உயிரிழந்ததால் விசாரணையில் சில சிக்கல்கள் ஏற்பட்டுள்ளன.

இருப்பினும், கடத்தல் உள்ளிட்ட பல்வேறு கோணங்களில் காவல்துறை தீவிர விசாரணை மேற்கொண்டு, சிறுமியை விரைவில் கண்டுபிடிக்கும் முயற்சியில் ஈடுபட்டுள்ளது.

Hindusthan Samachar / M.DEEPAK RAJA