புதுடெல்லி , 15 ஜூன் (ஹி.ச.)

நாடு முழுவதும் நடைபெற உள்ள NEET exam மறு தேர்வுக்கான ஹால் டிக்கெட்டை பதிவிறக்கம் செய்யும் பணியில் திடீர் தொழில்நுட்ப கோளாறு ஏற்பட்டதால், தேர்வர்கள் கடும் சிரமத்துக்கு உள்ளாகியுள்ளனர்.

அதிகாரப்பூர்வ இணையதளத்தில் ஹால் டிக்கெட்டை பெற முயன்றபோது, பக்கம் திறக்காமல் இருப்பது அல்லது பதிவிறக்கம் நடுவில் நிறுத்தப்படுவது போன்ற பிரச்சினைகள் ஏற்பட்டதாக தேர்வர்கள் தெரிவித்துள்ளனர்.

இதனால் நாடு முழுவதும் பல மாணவர்கள் அவதிக்குள்ளாகி, இணையதளத்தை மீண்டும் மீண்டும் முயற்சித்தும் பயனின்றி தவித்தனர்.

இந்த பிரச்சினை குறித்து National Testing Agency (என்.டி.ஏ.) விளக்கம் அளித்துள்ளது.

சர்வர் கோளாறு மற்றும் தொழில்நுட்ப சிக்கல்களை சரிசெய்யும் பணிகள் தொடர்ந்து நடைபெற்று வருவதாகவும், விரைவில் அனைத்து பிரச்சினைகளும் தீர்க்கப்பட்டு ஹால் டிக்கெட் பதிவிறக்கம் சீராக நடைபெறும் என்றும் அதிகாரிகள் தெரிவித்துள்ளனர்.

மேலும், இதுவரை சுமார் 4 லட்சம் தேர்வர்கள் ஹால் டிக்கெட்டை வெற்றிகரமாக பதிவிறக்கம் செய்துள்ளதாகவும் என்.டி.ஏ. தரப்பில் தெரிவிக்கப்பட்டுள்ளது.

தேர்வர்கள் பதற்றமடைய வேண்டாம் என்றும், சில நேரம் கழித்து மீண்டும் முயற்சித்தால் ஹால் டிக்கெட் பதிவிறக்கம் செய்ய முடியும் என்றும் அதிகாரிகள் அறிவுறுத்தியுள்ளனர்.

தொழில்நுட்ப கோளாறு விரைவில் முழுமையாக சரிசெய்யப்படும் எனவும் உறுதி அளிக்கப்பட்டுள்ளது.

Hindusthan Samachar / M.DEEPAK RAJA