புதுடெல்லி, 17 ஜூன் (ஹி.ச.)

மகாராஷ்டிரா கட்டமைக்கப்பட்ட குற்றச் சட்டம் (MCOCA) பிரிவின் கீழ் பதிவான ரூ.200 கோடி மோசடி வழக்கில் கணவர் சுகேஷ் சந்திரசேகருடன் சேர்ந்து லீனா பாலோஸ் ஜாமீன் கோரி மனு தாக்கல் செய்திருந்தார்.

கடந்த மே 5-ம் தேதி டெல்லி உயர் நீதிமன்றம், MCOCA வழக்கில் லீனாவுக்கு ஜாமீன் வழங்க மறுத்திருந்தது. அதேநேரம், அமலாக்கத்துறை (ED) தொடர்ந்த சட்டவிரோத பணப்பரிமாற்ற வழக்கில் ஜாமீன் வழங்கியது.

னா பாலோஸ் ஜாமீன் கோரி மனு இன்று நீதிபதிகள் ஜோய்மால்யா பாக்சி மற்றும் விபுல் எம். பஞ்சோலி அடங்கிய அமர்வு முன் இன்று விசாரணைக்கு வந்தது.

நீண்ட கால சிறைவாசம், விசாரணையில் தாமதம் மற்றும் ஏற்கெனவே ஜாமீன் பெற்ற சக குற்றவாளிகளுடன் சமத்துவம் ஆகியவற்றை காரணம் காட்டி லீனா உயர் நீதிமன்றத்தில் ஜாமீன் கோரியிருந்தார்.

நீதிபதிகளிடம், 2021 செப்டம்பர் முதல் காவலில் இருப்பதாகவும், சட்டவிரோத பணப்பரிமாற்ற தடுப்புச் சட்டத்தின் (PMLA) கீழ் விதிக்கப்பட்ட குறைந்தபட்ச மூன்று ஆண்டு தண்டனைக் காலத்தை முடித்துவிட்டதாகவும் அவரது வழக்கறிஞர் தெரிவித்தார்.

கைது செய்யப்பட்ட இரண்டு ஆண்டுகளுக்குப் பிறகே அமலாக்கத்துறை ஐந்தாவது துணை குற்றப்பத்திரிகையை தாக்கல் செய்ததாகவும், மூன்று ஆண்டுகள் சிறைவாசத்திற்குப் பிறகே விசாரணை வாதங்கள் தொடங்கியதாகவும் தரப்பில் வாதிடப்பட்டது.

லீனா ஒரு பெண் என்பதால் PMLA சட்டப்பிரிவு 45-ன் விதிகள் அவருக்கு பொருந்தாது என்றும், கணவரின் குற்றச் செயல்கள் குறித்து அவருக்கு தெரியாது என்றும் தரப்பில் வாதிடப்பட்டது. நடிகை மற்றும் பல் மருத்துவர் என சமூகத்தில் ஆழமான வேர்களைக் கொண்ட அவர், தப்பிச் செல்லும் அபாயம் இல்லாதவர் என்றும் வழக்கறிஞர் தெரிவித்தார்.

இந்த மனுவை டெல்லி காவல்துறையும் அமலாக்கத்துறையும் எதிர்த்தன. சுகேஷ் சந்திரசேகர் தலைமையிலான கட்டமைக்கப்பட்ட குற்றக் கும்பலின் இணைத் தலைவர் லீனா என்று அவர்கள் குற்றம்சாட்டினர்.

நிதி பரிமாற்றத்துக்கு உதவியதாகவும், குற்றத்தின் மூலம் கிடைத்த வருவாய்க்கு கடத்தியாக செயல்பட்டதாகவும், பல தனியுரிமை வங்கிக் கணக்குகளை இயக்கி அவற்றில் கோடிக்கணக்கான ரூபாய் டெபாசிட் செய்யப்பட்டதாகவும் தெரிவித்தன.

சுகேஷிடமிருந்து பெற்ற பணத்தைக் கொண்டு நெயில் ஆர்ட்டிஸ்ட்ரி தொழிலை தொடங்கியதாக லீனா தனது வாக்குமூலத்தில் ஒப்புக்கொண்டதாகவும் அமலாக்கத்துறை குறிப்பிட்டது.

MCOCA-வின் கீழ் ஜாமீன் பெறுவதற்கான தேவைகள் பூர்த்தி செய்யப்படவில்லை என்றும், விசாரணை நீதிமன்றத்தில் குற்றம்சாட்டப்பட்டவர்கள் தொடர்ந்து ஒத்திவைப்பு கோரியதாலேயே விசாரணையில் தாமதம் ஏற்பட்டதாகவும் டெல்லி காவல்துறை வாதிட்டது.

சக குற்றவாளிகளான பிங்கி இரானி மற்றும் அவ்தார் சிங் கோச்சார் ஆகியோருக்கு வழங்கப்பட்ட ஜாமீன் உத்தரவுகள் தற்போது சவாலுக்கு உட்படுத்தப்பட்டுள்ளதால், சமத்துவ வாதத்தையும் அது எதிர்த்தது.

லீனா வெறும் சுகேஷ் சந்திரசேகரின் மனைவி மட்டுமல்ல, குற்றக் கும்பலில் தீவிரமாக பங்கேற்றவர் என்றும், அவருக்கு எதிராக மேலும் பல முதல் தகவல் அறிக்கைகள் நிலுவையில் உள்ளதாகவும் அரசு தரப்பில் தெரிவிக்கப்பட்டது.

மேலும் வழக்கில் நடிகை லீனா மரியா பாலோஸ் தாக்கல் செய்த ஜாமீன் மனு தொடர்பாக, டெல்லி அரசுக்கு உச்ச நீதிமன்றம் இன்று நோட்டீஸ் அனுப்பியது.

இந்த வழக்கை ஜூலை 27-ம் தேதி விசாரணைக்கு ஒத்திவைத்து உச்சநீதிமன்றம் உத்தரவிட்டது.

Hindusthan Samachar / vidya.b