அமராவதி , 18 ஜூன் (ஹி.ச.)

ஆந்திரப் பிரதேச அரசு சார்பில் நடைபெறும் ‘யோகாந்த்ரா–2026’ திட்டம் தொடர்பாக முதல்வர் சந்திரபாபு நாயுடு தலைமையில் உயர்மட்ட ஆய்வு கூட்டம் நடைபெற்றது.

இந்த கூட்டத்தில் ‘இன்டின்டா யோகா’

(ஒவ்வொரு வீட்டிலும் யோகா) என்ற முழக்கத்தை வலுப்படுத்தி, யோகாவை மக்களின் அன்றாட வாழ்க்கையின் ஒரு பகுதியாக மாற்ற வேண்டும் என முதல்வர் அதிகாரிகளுக்கு அறிவுறுத்தினார்.

மேலும், அரசின் ‘சஞ்சீவனி’ சுகாதாரத் திட்டத்துடன் யோகா நடவடிக்கைகளை இணைக்கவும் அவர் கூறினார்.

வரவிருக்கும் ஜூன் 21 சர்வதேச யோகா தினத்தை முன்னிட்டு மாநிலம் முழுவதும் நடைபெறும் ‘யோகாந்த்ரா–2026’ நிகழ்ச்சிக்கு இதுவரை ஒரு கோடிக்கும் அதிகமானோர் பதிவு செய்துள்ளதாக அதிகாரிகள் தெரிவித்துள்ளனர்.

மாநிலம் முழுவதும் மொத்தம் 1.33 லட்சம் மையங்களில் யோகா நிகழ்ச்சிகள் நடத்த ஏற்பாடு செய்யப்பட்டுள்ளது.

மாநில அளவிலான முக்கிய விழா விஜயவாடா நகரிலுள்ள இந்திரா காந்தி முனிசிபல் ஸ்டேடியம் மைதானத்தில் நடைபெற உள்ளது.

இங்கு சுமார் 5,000 முதல் 6,000 பேர் கலந்து கொள்கிறார்கள். மழை பெய்தால் மாற்று ஏற்பாடாக அம்பேத்கர் கலா வேதிகையில் 1,000 பேர் பங்கேற்கும் வகையில் திட்டமிடப்பட்டுள்ளது.

இந்த விழாவில் யோகா குரு பாபா ராம்தேவ் பங்கேற்கிறார்.

அவர் ஜூன் 20 அன்று முதல்வருடன் இணைந்து சிறப்பு யோகா பயிற்சியில் கலந்து கொள்கிறார்.

இந்த திட்டத்திற்காக அரசு ரூ.10 கோடி நிதி ஒதுக்கியுள்ளது. மேலும், நீண்டநாள் நோயாளிகளுக்காக ‘தெரபியூட்டிக் யோகா’ பயிற்சிகள், மற்றும் “யோகா அஸ் டெஸ்டினேஷன்” என்ற புதிய காலண்டர் வெளியீடும் திட்டமிடப்பட்டுள்ளது.

மொத்தத்தில், ‘யோகாந்த்ரா–2026’ திட்டம் மாநிலம் முழுவதும் யோகாவை ஒரு பெரிய மக்கள் இயக்கமாக மாற்றும் நோக்கில் விரிவாக செயல்படுத்தப்பட்டு வருகிறது.

Hindusthan Samachar / M.DEEPAK RAJA