புதுடெல்லி, 19 ஜூன் (ஹி.ச.)

நீட்-யுஜி 2026 மறுதேர்வை முன்னிட்டு டெலிகிராம் செயலிக்கு விதிக்கப்பட்ட தற்காலிக தடையை நீக்கக் கோரி தாக்கல் செய்யப்பட்ட மனுவை டெல்லி உயர்நீதிமன்றம் தள்ளுபடி செய்துள்ளது.

மத்திய அரசின் நடவடிக்கை நியாயமானது மற்றும் பொதுநலன் கருதியே எடுக்கப்பட்டுள்ளதாக நீதிமன்றம் கருத்து தெரிவித்துள்ளது.

வரும் ஜூன் 21-ஆம் தேதி நடைபெற உள்ள நீட்-யுஜி மறுதேர்வில் கேள்வித்தாள் கசிவு, போலி வினாத்தாள் பரவல் மற்றும் தேர்வு முறைகேடுகளைத் தடுக்க, டெலிகிராம் செயலிக்கு ஜூன் 22 வரை தற்காலிக தடை விதிக்க மத்திய அரசு உத்தரவிட்டிருந்தது. மேலும், பழைய பதிவுகளைத் திருத்தும் (Edit) வசதியும் ஜூன் 30 வரை முடக்கப்பட்டுள்ளது.

தேசிய தேர்வு முகமை (NTA) பரிந்துரையின் அடிப்படையில், தகவல் தொழில்நுட்பச் சட்டத்தின் 69A பிரிவின் கீழ் இந்த நடவடிக்கை எடுக்கப்பட்டதாக மத்திய அரசு தெரிவித்துள்ளது. கடந்த சில மாதங்களாக டெலிகிராம் தளத்தில் நீட் தேர்வு கேள்வித்தாள்கள் கசிந்ததாக கூறி பல்வேறு சேனல்கள் மற்றும் குழுக்கள் செயல்பட்டதாகவும், இது தேர்வர்களை ஏமாற்றும் மோசடி கும்பல்களுக்கு வழிவகுத்ததாகவும் அரசு தரப்பில் வாதிடப்பட்டது.

இந்தத் தடையால் இந்தியாவில் உள்ள 15 கோடிக்கும் அதிகமான டெலிகிராம் பயனர்கள் பாதிக்கப்படுவதாகக் கூறி, டெலிகிராம் நிறுவனம் டெல்லி உயர்நீதிமன்றத்தை அணுகியது. எனினும், தேர்வின் நேர்மையையும் நம்பகத்தன்மையையும் பாதுகாப்பது தற்போதைய சூழலில் மிக முக்கியம் என்பதால், மத்திய அரசின் உத்தரவில் தலையிட முடியாது என்று நீதிமன்றம் தெரிவித்தது.

இந்த வழக்கின் மூலம், தேர்வு பாதுகாப்பு மற்றும் டிஜிட்டல் தளங்களின் சுதந்திரம் ஆகிய இரண்டுக்கும் இடையிலான சமநிலை குறித்து புதிய விவாதம் எழுந்துள்ளது. ஒரு புறம் தேர்வு முறைகேடுகளைத் தடுக்கும் அரசின் கடமை வலியுறுத்தப்படுகின்ற நிலையில், மறுபுறம் கோடிக்கணக்கான பயனர்களைப் பாதிக்கும் வகையில் முழு தளத்தையும் முடக்குவது சரியானதா என்ற கேள்வியும் எழுந்துள்ளது.

எனினும், நீட் மறுதேர்வு சுமுகமாகவும் வெளிப்படையாகவும் நடைபெற வேண்டும் என்ற நோக்கத்தில் மத்திய அரசு எடுத்துள்ள தற்காலிக நடவடிக்கைக்கு டெல்லி உயர்நீதிமன்றம் ஒப்புதல் அளித்திருப்பது குறிப்பிடத்தக்கது.

Hindusthan Samachar / VINOTH KUMAR P