திருப்பத்தூர், 19 ஜூன் (ஹி.ச.)

திருப்பத்தூர் மாவட்டம் வாணியம்பாடி அடுத்த மேல் நிம்மியம்பட்டு பகுதியைச் சேர்ந்த தாஜுதீன், இஸ்தியாக் என்ற முன்னா மற்றும் அமர்சிங் ஆகியோர் நண்பர்கள் என கூறப்படுகிறது. இவர்கள் மூவரும் சம்பவத்தன்று ஒன்றாக அமர்ந்து மது அருந்திக் கொண்டிருந்ததாக தகவல்கள் தெரிவிக்கின்றன.

அப்போது அவர்களுக்கிடையே திடீரென வாக்குவாதம் ஏற்பட்டதாக கூறப்படுகிறது. ஆரம்பத்தில் வாய்த்தகராறாக இருந்த பிரச்சினை, பின்னர் முற்றி கைகலப்பாக மாறியதாக தெரிகிறது.

இதில் ஆத்திரமடைந்த தாஜுதீன், அருகில் இருந்த பீர் பாட்டிலை உடைத்து இஸ்தியாக் என்கிற முன்னாவை சரமாரியாக குத்தியதாக கூறப்படுகிறது. தாக்குதலில் பலத்த காயமடைந்த முன்னா ரத்த வெள்ளத்தில் சரிந்து விழுந்தார்.

சம்பவத்தை கண்ட அப்பகுதியினர் உடனடியாக அவரை மீட்டு மருத்துவமனைக்கு கொண்டு செல்ல முயன்றனர். ஆனால் அவர் சம்பவ இடத்திலேயே உயிரிழந்ததாக தகவல்கள் தெரிவிக்கின்றன.

இதுகுறித்து தகவல் அறிந்த ஆலங்காயம் காவல்துறையினர் சம்பவ இடத்திற்கு விரைந்து சென்று விசாரணை மேற்கொண்டனர். உயிரிழந்த முன்னாவின் உடலை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர்.

தொடர்ந்து நடத்திய விசாரணையின் அடிப்படையில், சம்பவத்தில் தொடர்புடைய தாஜுதீன் மற்றும் அமர்சிங் ஆகிய இருவரையும் போலீசார் கைது செய்தனர்.

Hindusthan Samachar / ANANDHAN