அகர்தலா, 02 ஜூன் (ஹி.ச.)

திரிபுரா மாநிலம் அகர்தலாவில், இந்திய ராணுவம் மற்றும் தேசிய பேரிடர் மீட்புப் படையினர் (NDRF) இணைந்து இன்று (ஜூன் 02) வெள்ள நிவாரணம் மற்றும் மீட்பு ஒத்திகைப் பயிற்சியில் ஈடுபட்டனர்.

பேரிடர் காலங்களில் பல்வேறு துறைகளுக்கு இடையேயான ஒருங்கிணைப்பையும், தயார்நிலையையும் வெளிப்படுத்தும் வகையில் இந்த ஒத்திகை அமைந்தது.

இந்தப் பயிற்சியில், குடிமை நிர்வாக பிரதிநிதிகள், உள்ளூர் பங்குதாரர்கள் மற்றும் பொதுமக்கள் பங்கேற்றனர். பேரிடர் தயார்நிலை மற்றும் அவசரகால மீட்பு நடவடிக்கைகள் குறித்து அவர்களுக்கு விளக்கமளிக்கப்பட்டது.

திரிபுரா மற்றும் அதனைச் சுற்றியுள்ள பகுதிகளில் வெள்ளம் தொடர்பான அவசரநிலைகள் மற்றும் இயற்கை பேரிடர்களைக் கையாள்வதில், இரு அமைப்புகளுக்கும் இடையேயான செயல்பாட்டு ஒருங்கிணைப்பு, இயங்குதிறன் மற்றும் ஒத்துழைப்பை மேம்படுத்துவதே இந்த ஒத்திகையின் நோக்கமாகும்.

உண்மையான வெள்ளப்பெருக்கைப் போன்று காட்சிப்படுத்தப்பட்ட இந்த ஒத்திகையில், சிக்கித் தவிக்கும் பொதுமக்களை மீட்பது, வெள்ளம் சூழ்ந்த பகுதிகளிலிருந்து வெளியேற்றுவது, மருத்துவ உதவி வழங்குவது, நிவாரண முகாம்களை அமைப்பது மற்றும் அத்தியாவசியப் பொருட்களைக் கொண்டு சேர்ப்பது ஆகியவை இடம்பெற்றன.

இந்திய ராணுவம் மற்றும் NDRF குழுக்கள், சிறப்பு மீட்பு நுட்பங்கள், மீட்புப் படகுகளை இயக்குதல், காயமடைந்தோரை வெளியேற்றும் நடைமுறைகள், தகவல் தொடர்பு வழிமுறைகள் மற்றும் ஒருங்கிணைந்த நிவாரணப் பணிகளைச் செய்து காட்டின.

இந்த ஒத்திகையின் மூலம், இரு அமைப்புகளும் தங்களது நிலையான செயல்பாட்டு நடைமுறைகளைச் சரிபார்த்து, மீட்பு வழிமுறைகளை மேம்படுத்தி, கூட்டு செயல்பாட்டுத் திறனை வலுப்படுத்திக்கொண்டன. பேரிடர் காலங்களில் உயிர்களையும் உடைமைகளையும் பாதுகாப்பதில் இந்திய ராணுவம் மற்றும் NDRF-ன் உறுதிப்பாட்டை இந்தப் பயிற்சி மீண்டும் உறுதி செய்தது.

இயற்கை சீற்றங்களின் தாக்கத்தைக் குறைக்க, ஒருங்கிணைந்த அணுகுமுறை, பயனுள்ள வளப் பகிர்வு மற்றும் விரைவான முடிவெடுத்தல் ஆகியவற்றின் முக்கியத்துவத்தை இந்த ஒத்திகை அடிக்கோடிட்டுக் காட்டியது.

Hindusthan Samachar / vidya.b