புதுடெல்லி, 02 ஜூன் (ஹி.ச.)

இந்தியாவில் மே மாதத்திற்கான சரக்கு மற்றும் சேவை வரி (GST) வசூல் ரூ.1.94 லட்சம் கோடியாக பதிவாகியுள்ளது.

இது கடந்த ஆண்டு இதே மாதத்துடன் ஒப்பிடுகையில் 3.2 சதவீதம் அதிகமாகும் என்று மத்திய நிதி அமைச்சகம் வெளியிட்டுள்ள தரவுகள் தெரிவிக்கின்றன.

அதிகாரப்பூர்வ தரவுகளின்படி,

மே 2026 மாதத்தில் மொத்த ஜி.எஸ்.டி. வசூல் ரூ.1,94,184 கோடியாக இருந்தது.

கடந்த ஆண்டு மே மாதத்தில் இது ரூ.1,88,172 கோடியாக இருந்தது. வரி திருப்பிச் செலுத்தல்கள் (Refunds) கழித்த பின், நிகர ஜி.எஸ்.டி. வருவாய் ரூ.1.66 லட்சம் கோடியாக உயர்ந்துள்ளது.

இந்த வளர்ச்சிக்கு முக்கிய காரணமாக இறக்குமதி சார்ந்த வருவாய் உயர்வு கருதப்படுகிறது.

இறக்குமதியிலிருந்து கிடைத்த IGST வசூல் 19.1 சதவீதம் அதிகரித்து ரூ.59,654 கோடியாக உயர்ந்துள்ளது.

தொழில்துறை உற்பத்திக்கான மூலப்பொருட்கள் மற்றும் எரிசக்தி இறக்குமதிகள் அதிகரித்ததே இதற்கு காரணமாக நிதி அமைச்சக வட்டாரங்கள் தெரிவித்துள்ளன.

ஆனால், உள்நாட்டு ஜி.எஸ்.டி. வசூலில் சற்று மந்தநிலை காணப்பட்டுள்ளது.

உள்நாட்டு மொத்த வருவாய் 2.6 சதவீதம் குறைந்து ரூ.1.34 லட்சம் கோடியாக பதிவாகியுள்ளது.

எனினும், கடந்த ஆண்டு மே மாதத்தில் ஒரு தொலைத்தொடர்பு நிறுவனம் ஸ்பெக்ட்ரம் ஒதுக்கீடு தொடர்பாக ஒருமுறை மட்டும் செலுத்திய சுமார் ரூ.10,000 கோடி தொகை இருந்ததால், அதனை கணக்கில் இருந்து நீக்கிப் பார்த்தால் இந்த ஆண்டின் ஜி.எஸ்.டி. வளர்ச்சி சுமார் 9 சதவீதமாக இருக்கும் என மத்திய அரசு விளக்கம் அளித்துள்ளது.

மேலும், 2026–27 நிதியாண்டின் முதல் இரண்டு மாதங்களான ஏப்ரல்–மே காலகட்டத்தில் மொத்த ஜி.எஸ்.டி. வசூல் ரூ.4.36 லட்சம் கோடியாக உயர்ந்து, 6.2 சதவீத வளர்ச்சியைப் பதிவு செய்துள்ளது.

இது நாட்டின் பொருளாதார செயல்பாடுகள் மற்றும் வரி வசூல் நிலைத்தன்மை தொடர்வதை சுட்டிக்காட்டுவதாக பொருளாதார நிபுணர்கள் மதிப்பிட்டுள்ளனர்.

Hindusthan Samachar / VINOTH KUMAR P