சேலம், 20 ஜூன் (ஹி.ச.)

இளநிலை மருத்துவ படிப்பின் தேசிய தகுதி மற்றும் நுழைவுத் தேர்வான நீட் தேர்வை எழுதும் மாணவ-மாணவிகளின் நலன் கருதி, சேலம் மாவட்டத்திற்கு நாளை சிறப்பு ரயில்களை இயக்க தெற்கு ரயில்வே நிர்வாகம் முடிவு செய்துள்ளது.

தேர்வு மையங்களுக்கு மாணவர்கள் எவ்வித சிரமமுமின்றி உரிய நேரத்தில் சென்றடைய வேண்டும் என்ற நோக்கில் இந்த ஏற்பாடு செய்யப்பட்டுள்ளதாக ரயில்வே அதிகாரிகள் தெரிவித்தனர்.

இதன்படி, சின்னசேலம் மற்றும் திருப்பத்தூர் ஆகிய இரு மார்க்கங்களில் இருந்து சேலத்திற்கு சிறப்பு ரயில்கள் இயக்கப்பட உள்ளன.

சின்னசேலத்தில் இருந்து நாளை காலை 10:00 மணிக்கு புறப்படும் சிறப்பு ரயில், காலை 11:20 மணியளவில் சேலம் ரயில் நிலையத்தை வந்தடையும்.

அதேபோல், திருப்பத்தூரில் இருந்து காலை 7:45 மணிக்கு புறப்படும் மற்றொரு சிறப்பு ரயில், காலை 10:45 மணிக்கு சேலத்தை சென்றடையும் வகையில் கால அட்டவணை வகுக்கப்பட்டுள்ளது.

நீட் தேர்வு நடைபெறும் நாளில் மாணவர்களின் பயண நெரிசலை குறைக்கவும், தேர்வுக்கு தாமதமின்றி செல்லவும் இந்த சிறப்பு ரயில் சேவை பெரிதும் உதவும் என எதிர்பார்க்கப்படுகிறது.

மாணவர்கள் இந்த வாய்ப்பை பயன்படுத்திக்கொண்டு தங்கள் பயணத்தை முன்கூட்டியே திட்டமிட்டுக்கொள்ளுமாறு ரயில்வே நிர்வாகம் கேட்டுக்கொண்டுள்ளது.

மேலும் விவரங்களுக்கு அருகிலுள்ள ரயில் நிலையங்களை தொடர்பு கொள்ளலாம் எனவும் அறிவிக்கப்பட்டுள்ளது.

Hindusthan Samachar / vidya.b