பெரியபாளையம், 21 ஜூன் (ஹி.ச.)

திருவள்ளூர் மாவட்டம், பெரியபாளையம் அருகே செயல்பட்டு வரும் தனியார் இறால் பதப்படுத்தும் தொழிற்சாலையில் இன்று காலை திடீரென அமோனியா வாயு கசிவு ஏற்பட்டது.

இந்த எதிர்பாராத விபத்தில், தொழிற்சாலைக்குள் பணியில் ஈடுபட்டிருந்த 20க்கும் மேற்பட்ட ஊழியர்கள் மூச்சுத்திணறல் ஏற்பட்டு மயக்கமடைந்தனர்.

இறால்களை குளிரூட்டி பதப்படுத்துவதற்காக பயன்படுத்தப்படும் அமோனியா வாயு குழாயில் ஏற்பட்ட தொழில்நுட்ப கோளாறு காரணமாகவே இந்த கசிவு ஏற்பட்டதாக முதற்கட்ட தகவல்கள் தெரிவிக்கின்றன.

வாயு கசிந்தவுடன் ஆலை முழுவதும் துர்நாற்றம் பரவியதுடன், அங்கிருந்த தொழிலாளர்கள் கண் எரிச்சல், வாந்தி மற்றும் மூச்சு விடுவதில் சிரமம் ஏற்பட்டு ஒவ்வொருவராக மயங்கி விழுந்துள்ளனர்.

சக ஊழியர்கள் உடனடியாக அபாய ஒலி எழுப்பி ஆலை நிர்வாகத்திற்கு தகவல் தெரிவித்தனர். இதையடுத்து பாதிக்கப்பட்ட அனைவரும் உடனடியாக மீட்கப்பட்டு பெரியபாளையம் மற்றும் திருவள்ளூர் அரசு மருத்துவமனைகளுக்கு ஆம்புலன்ஸ் மூலம் அனுப்பி வைக்கப்பட்டனர்.

மருத்துவர்கள் தீவிர சிகிச்சை அளித்து வருகின்றனர். பாதிக்கப்பட்டவர்களில் சிலரது நிலை கவலைக்கிடமாக இருப்பதாக மருத்துவமனை வட்டாரங்கள் தெரிவிக்கின்றன.

சம்பவம் குறித்து தகவலறிந்த வந்தவாசி காவல்துறையினர் மற்றும் தீயணைப்பு துறையினர் ஆலைக்கு விரைந்து சென்று வாயு கசிவை கட்டுப்படுத்தும் பணியில் ஈடுபட்டனர்.

முன்னெச்சரிக்கை நடவடிக்கையாக ஆலையில் இருந்த அனைத்து ஊழியர்களும் வெளியேற்றப்பட்டு, ஆலைக்கு தற்காலிகமாக சீல் வைக்கப்பட்டுள்ளது.

இந்த விபத்து குறித்து மாவட்ட தொழிலக பாதுகாப்பு அதிகாரிகள் நேரில் ஆய்வு செய்து விசாரணை நடத்தி வருகின்றனர்.

ஆலையில் போதிய பாதுகாப்பு ஏற்பாடுகள் இருந்ததா, அமோனியா குழாய்கள் முறையாக பராமரிக்கப்பட்டனவா என்பது குறித்து விசாரணை நடைபெற்று வருகிறது.

Hindusthan Samachar / vidya.b