புதுடெல்லி, 21 ஜூன் (H.S.)

கேள்வித்தாள் கசிவு குற்றச்சாட்டுகளால் ரத்து செய்யப்பட்ட நீட் யுஜி 2026 தேர்வின் மறுதேர்வு இன்று நாடு முழுவதும் கோலாகலமாகவும், கடும் பாதுகாப்பு ஏற்பாடுகளுடனும் தொடங்கியது.

தேசிய தேர்வு முகமை (NTA) நடத்தும் இந்த மறுதேர்வு, நாடு முழுவதும் 551 நகரங்களில் மற்றும் வெளிநாடுகளில் 14 நகரங்களில் உள்ள மொத்தம் 5,440 தேர்வு மையங்களில் நடைபெறுகிறது.

சுமார் 22 லட்சத்துக்கும் அதிகமான மாணவர்கள் இந்த முக்கிய தேர்வில் பங்கேற்கின்றனர்.

மதியம் 2 மணிக்கு தொடங்கிய இந்த தேர்வு, மாலை 5.15 மணி வரை நடைபெறுகிறது.

முழுமையாக பேப்பர்–பென் (ஆஃப்லைன்) முறையில் தேர்வு நடத்தப்படுகிறது.

முன்னதாக நடைபெற்ற தேர்வில் கேள்வித்தாள் கசிவு குற்றச்சாட்டுகள் எழுந்ததை அடுத்து, தேர்வு ரத்து செய்யப்பட்ட நிலையில், இந்த மறுதேர்வு மிகுந்த கவனத்துடன் நடத்தப்பட்டு வருகிறது.

தேர்வில் எந்தவித அசம்பாவிதமும் ஏற்படாமல் இருக்க இதுவரை இல்லாத அளவுக்கு கடுமையான பாதுகாப்பு ஏற்பாடுகள் செய்யப்பட்டுள்ளன.

தேர்வு மையங்களில் லட்சக்கணக்கான சிசிடிவி கேமராக்கள் பொருத்தப்பட்டுள்ளதுடன், ஆயிரக்கணக்கான ஜாமர்களும் அமைக்கப்பட்டுள்ளன.

மேலும், போலீஸ் பாதுகாப்பு, சைபர் கண்காணிப்பு ஆகியவையும் தீவிரப்படுத்தப்பட்டுள்ளன.

கேள்வித்தாள்களின் பாதுகாப்பை உறுதி செய்ய இந்திய விமானப்படையின் உதவியும் பெறப்பட்டுள்ளது. மாணவர்கள் அட்மிட் கார்டு மற்றும் புகைப்பட அடையாள அட்டையை சரிபார்த்த பின்னரே தேர்வு மையங்களுக்குள் அனுமதிக்கப்பட்டனர்.

தேர்வு மையங்களுக்கு மாணவர்கள் காலை முதலே முன்கூட்டியே வருகை தந்தனர்.

தேர்வு முறையில் வெளிப்படைத்தன்மை மற்றும் நம்பகத்தன்மையை உறுதி செய்யும் வகையில் அனைத்து நடவடிக்கைகளும் மேற்கொள்ளப்பட்டுள்ளதாக அதிகாரிகள் தெரிவித்தனர்.

Hindusthan Samachar / M.DEEPAK RAJA