புதுடெல்லி, 21 ஜூன் (ஹி.ச.)

உலகளாவிய பொருளாதார மந்தநிலை, போர் பதற்றங்கள் மற்றும் வர்த்தக தடைகள் போன்ற பல்வேறு சவால்களுக்கு மத்தியிலும், இந்தியாவின் ஏற்றுமதி துறை குறிப்பிடத்தக்க வளர்ச்சியை பதிவு செய்துள்ளது.

நடப்பு நிதியாண்டின் முதல் காலாண்டில், ஏப்ரல் 1 முதல் ஜூன் 14 வரை இந்தியாவின் பொருட்கள் ஏற்றுமதி கடந்த ஆண்டின் இதே காலத்துடன் ஒப்பிடுகையில் சுமார் 15 சதவீதம் உயர்ந்துள்ளதாக மத்திய வர்த்தக மற்றும் தொழில்துறை அமைச்சர் பியூஸ் கோயல் தெரிவித்துள்ளார்.

இந்திய தொழில் வர்த்தக சபை கூட்டத்தில் பேசிய அவர்,

உலகளாவிய வர்த்தகத்தில் நிலவும் நிச்சயமற்ற சூழ்நிலைகள், அமெரிக்கா உள்ளிட்ட நாடுகளின் சுங்கக் கட்டணக் கொள்கைகள் மற்றும் புவிசார் அரசியல் பதற்றங்கள் ஆகியவற்றின் தாக்கத்தையும் மீறி இந்திய ஏற்றுமதி தொடர்ந்து வளர்ச்சி கண்டு வருவதாக கூறினார்.

பொறியியல் பொருட்கள், மருந்துப் பொருட்கள், மின்னணு சாதனங்கள், வேளாண் பொருட்கள் மற்றும் சேவைத் துறைகளின் ஏற்றுமதி வளர்ச்சி இந்த முன்னேற்றத்திற்கு முக்கிய காரணமாக அமைந்துள்ளதாக தெரிவிக்கப்பட்டுள்ளது.

குறிப்பாக, 'மேக் இன் இந்தியா' திட்டம் மற்றும் உற்பத்தி சார்ந்த ஊக்கத் திட்டங்கள் (PLI) இந்திய உற்பத்தித் துறைக்கு புதிய வாய்ப்புகளை உருவாக்கியுள்ளதாகவும் அவர் குறிப்பிட்டார்.

மேலும், 2026-27 நிதியாண்டில் இந்தியாவின் மொத்த ஏற்றுமதி மதிப்பை ஒரு டிரில்லியன் அமெரிக்க டாலராக உயர்த்தும் இலக்கை மத்திய அரசு நிர்ணயித்துள்ளதாகவும், அதனை அடைவதற்கான நடவடிக்கைகள் தீவிரமாக மேற்கொள்ளப்பட்டு வருவதாகவும் அமைச்சர் தெரிவித்தார்.

Hindusthan Samachar / VINOTH KUMAR P