திருப்பூர், 23 ஜூன் (ஹி.ச.)

திருப்பூரில் பின்னலாடைத் தொழிலுக்கு முக்கிய மூலப்பொருளாக விளங்கும் நூலின் விலை மீண்டும் உயர்ந்துள்ளது.

கிலோவுக்கு ரூ.5 வரை நூல் விலை அதிகரிக்கப்பட்டிருப்பது ஆடை உற்பத்தியாளர்களிடையே அதிருப்தியை ஏற்படுத்தியுள்ளது.

நடப்பு மாதத்தில் ஏற்கனவே இரண்டு முறை நூல் விலை குறைக்கப்பட்டிருந்ததால், பின்னலாடை உற்பத்தியாளர்கள் மற்றும் ஏற்றுமதியாளர்கள் மகிழ்ச்சியடைந்திருந்தனர்.

மூலப்பொருள் செலவு குறைந்ததால் உற்பத்திச் செலவும் குறையும் என்ற எதிர்பார்ப்பு தொழில் துறையினரிடையே நிலவியது.

இந்த நிலையில், திடீரென கிலோவுக்கு ரூ.5 உயர்த்தப்பட்டுள்ளதாக நூற்பாலைகள் அறிவித்துள்ளன. இந்த விலை உயர்வு பின்னலாடை உற்பத்தியாளர்களுக்கு அதிர்ச்சியை ஏற்படுத்தியுள்ளது.

ஏற்கனவே சர்வதேச சந்தை நிலவரம், உற்பத்திச் செலவு உயர்வு மற்றும் தொழிலாளர் செலவுகள் உள்ளிட்ட பல்வேறு சவால்களை எதிர்கொண்டு வரும் நிலையில், நூல் விலை உயர்வு கூடுதல் சுமையாக அமைந்துள்ளதாக தொழில் துறையினர் தெரிவிக்கின்றனர்.

திருப்பூர் பின்னலாடைத் துறை, இந்தியாவின் முக்கிய ஏற்றுமதி மையமாக விளங்கி வருகிறது. இங்கு ஆயிரக்கணக்கான சிறு, குறு மற்றும் நடுத்தர ஆடை உற்பத்தி நிறுவனங்கள் செயல்பட்டு வருகின்றன. இந்நிறுவனங்களின் உற்பத்திச் செலவில் நூலின் விலை முக்கிய பங்காற்றுவதால், அதில் ஏற்படும் மாற்றங்கள் தொழில்துறையை நேரடியாக பாதிக்கக்கூடியவை.

இதுவரை நூல் விலை உயர்வு மற்றும் குறைப்பு தொடர்பான அறிவிப்புகள் மாதத்திற்கு ஒருமுறை அல்லது 15 நாட்களுக்கு ஒருமுறை வெளியிடப்பட்டு வந்தன.

ஆனால் தற்போது சந்தை நிலவரத்தை கருத்தில் கொண்டு, இனி வாரத்திற்கு ஒருமுறை நூல் விலை தொடர்பான அறிவிப்பு வெளியிடப்படும் என்று நூற்பாலைகள் தெரிவித்துள்ளன.

இதனால் நூல் விலை அடிக்கடி மாறக்கூடிய சூழல் உருவாகியுள்ளது.

விலை நிலைத்தன்மை இல்லாததால் உற்பத்தித் திட்டமிடல் மற்றும் ஏற்றுமதி ஒப்பந்தங்களை மேற்கொள்வதில் சிக்கல்கள் ஏற்படக்கூடும் என பின்னலாடை உற்பத்தியாளர்கள் கவலை தெரிவிக்கின்றனர்.

Hindusthan Samachar / ANANDHAN