ஹைதராபாத் , 26 ஜூன் (ஹி.ச.)

தெலங்கானா மாநில அரசு ஊழியர்கள் மற்றும் ஓய்வூதியதாரர்களுக்கு இலவச விபத்து காப்பீடு வழங்கப்படும் என முதல்வர் ரேவந்த் ரெட்டி தெரிவித்துள்ளார்.

அரசு ஊழியர்களின் நலனை பாதுகாப்பது அரசின் பொறுப்பு எனவும், பிஆர்சி (பே விகித மறுசீரமைப்பு ஆணையம்) தொடர்பான வாக்குறுதி நிச்சயமாக நிறைவேற்றப்படும் எனவும் அவர் உறுதி அளித்தார்.

இது தொடர்பாக அரசு 14 வங்கிகளுடன் புரிந்துணர்வு ஒப்பந்தங்களை (MoU) மேற்கொண்டுள்ளது.

ரவீந்திர பாரதி அரங்கில் நடைபெற்ற நிகழ்ச்சியில் முதல்வர் ரேவந்த் ரெட்டி நேரில் பங்கேற்று, இந்த ஒப்பந்தங்களில் கையெழுத்திட்டு திட்டத்தை தொடங்கி வைத்தார்.

இந்த திட்டத்தின் கீழ், அரசு ஊழியர்கள், ஓய்வூதியதாரர்கள் மட்டுமின்றி ஒப்பந்தம், அவுட்சோர்சிங் மற்றும் தற்காலிக ஊழியர்களுக்கும் இலவச விபத்து காப்பீடு வழங்கப்பட உள்ளது. இதில் விபத்து காப்பீடு தொகை ரூ.1 கோடி முதல் ரூ.1.5 கோடி வரை வழங்கப்படும் எனவும், விமான விபத்து ஏற்பட்டால் ரூ.2 கோடி முதல் ரூ.3 கோடி வரை காப்பீடு கிடைக்கும் எனவும் தெரிவிக்கப்பட்டுள்ளது.

மேலும், ஓய்வு பெற்ற பிறகும் சில காப்பீட்டு பலன்கள் தொடரும் வகையில் நடவடிக்கை எடுக்கப்பட்டுள்ளதாக அரசு கூறியுள்ளது.

அரசுக்காக உழைக்கும் ஊழியர்களின் பாதுகாப்பை உறுதி செய்வது அரசின் கடமை என முதல்வர் கூறினார். ஊழியர்கள் கேட்காமல் அரசே முன்வந்து இந்த திட்டத்தை செயல்படுத்தியுள்ளது எனவும் அவர் தெரிவித்தார்.

மேலும், மாநில வருவாயை அதிகரிக்க ஊழியர்கள் தினமும் கூடுதல் ஒரு மணி நேரம் பணியாற்ற வேண்டும் என அவர் வேண்டுகோள் விடுத்தார்.

ஒவ்வொரு மாதமும் முதல் தேதியிலேயே ஊழியர்களுக்கு சம்பளம் வழங்கப்படுவதாகவும் அவர் குறிப்பிட்டார்.

இதற்கு முன்னதாக, கடந்த அரசின் காலத்தில் சம்பளம் வழங்குவதில் சிக்கல் இருந்ததாகவும், தற்போது அரசு நிலையான முறையில் சம்பளம் வழங்கி வருவதாகவும் முதல்வர் தெரிவித்தார்.

அதேபோல், மாநில வளர்ச்சி திட்டங்களுக்கு எதிர்க்கட்சிகள் தடையாக செயல்படுவதாகவும் அவர் குற்றம்சாட்டினார்.

Hindusthan Samachar / M.DEEPAK RAJA