சென்னை, 27 ஜூன் (ஹி.ச.)

தமிழ் சினிமா வரலாற்றில் இயக்குனர், திரைக்கதை ஆசிரியர், வசனகர்த்தா, நடிகர், தயாரிப்பாளர் எனப் பன்முகத் திறமைகளுடன் முத்திரை பதித்தவர் கே. பாக்யராஜ். 1980 மற்றும் 90-களில் எளிய நடுத்தர குடும்பக் கதைகள், யதார்த்தமான நகைச்சுவை, மற்றும் சமூகக் கருத்துக்கள் மூலம் தமிழ் ரசிகர்களின் நெஞ்சங்களைக் கவர்ந்தவர்.

எளிய மனிதர்களின் வாழ்வியலைத் திரையில் கொண்டு வந்து, தமிழ் சினிமாவின் போக்கையே மாற்றியமைத்த பெருமை இவருக்கு உண்டு.

பாக்யராஜ் ஜனவரி 7, 1953 அன்று ஈரோடு மாவட்டம், கோபிச்செட்டிபாளையம் அருகே உள்ள வெள்ளாங்கோயில் என்ற கிராமத்தில் பிறந்தார்.

இவருடைய பெற்றோர் கிருஷ்ணசாமி மற்றும் அமராவதி ஆவர். சிறு வயது முதலே கதைகள் எழுதுவதிலும், கலைத்துறையிலும் ஆர்வம் கொண்டிருந்தார்.

சினிமா கனவோடு சென்னை வந்த பாக்யராஜ், தமிழ் சினிமாவின் இமயம் என்று அழைக்கப்படும் இயக்குனர் பாரதிராஜாவிடம் உதவி இயக்குனராகத் தனது கலைப் பயணத்தைத் தொடங்கினார்.

'16 வயதினிலே' மற்றும் 'கிழக்கே போகும் ரயில்' போன்ற படங்களில் உதவி இயக்குனராகப் பணியாற்றினார்.

பாரதிராஜா இயக்கிய 'சிகப்பு ரோஜாக்கள்', 'டிக் டிக் டிக்' போன்ற வெற்றிப் படங்களுக்குத் திரைக்கதை மற்றும் வசனம் எழுதி, சிறந்த எழுத்தாளராகத் தன்னை நிரூபித்தார்.

1979-ஆம் ஆண்டு வெளியான 'சுவரில்லாத சித்திரங்கள்' திரைப்படத்தின் மூலம் முதன்முதலில் இயக்குனராகவும் நடிகராகவும் அறிமுகமானார்.

இவரது தனித்துவமான நடிப்பு மற்றும் யதார்த்தமான வசனங்கள் ரசிகர்களை வெகுவாகக் கவர்ந்தன.

இவரது இயக்கத்தில் வெளிவந்த 'அந்த 7 நாட்கள்' திரைப்படம் காதலுக்கும் கடமைக்கும் இடையே உள்ள போராட்டத்தை உணர்வுபூர்வமாகக் காட்டிய படம். 'முந்தானை முடிச்சு' திரைப்படம் கிராமத்து பின்னணியில் உருவான இந்தத் திரைப்படம் தமிழ் சினிமா வரலாற்றில் மாபெரும் வசூல் சாதனை படைத்தது.

'சின்ன வீடு', 'தாவணிக்கனவுகள்', 'இன்று போய் நாளை வா', 'டார்லிங் டார்லிங் டார்லிங்', 'இது நம்ம ஆளு' போன்ற 25-க்கும் மேற்பட்ட படங்களை இயக்கிய பாக்யராஜ் 75-க்கும் மேற்பட்ட படங்களில் நடித்துள்ளார்.

மக்கள் திலகம் எம்.ஜி.ஆர் அவர்களால் எனது கலை வாரிசு என்று பகிரங்கமாகப் பாராட்டப்பட்ட ஒரே கலைஞர் பாக்யராஜ் ஆவார்.

அமிதாப் பச்சன் இரட்டை வேடத்தில் நடித்த 'ஆக்ரி ராஸ்தா' (1986) என்ற சூப்பர் ஹிட் இந்தி திரைப்படத்தை எழுதி இயக்கினார்.

'பாக்யா' என்ற வார இதழின் ஆசிரியராக இருந்து, பல நாவல்களையும் விறுவிறுப்பான கேள்வி-பதில் பகுதிகளையும் எழுதினார்.

தமிழ் சினிமாவிற்கு ஊர்வசி, கல்பனா, பானுப்ரியா போன்ற முன்னணி நடிகைகளை அறிமுகப்படுத்திய பெருமை இவருக்கு உண்டு.

1981-ல் நடிகை பிரவீனாவைத் திருமணம் செய்தார், ஆனால் அவர் 1983-ல் உடல்நலக் குறைவால் காலமானார்.

பின்னர் 1984-ல் நடிகை பூர்ணிமா ஜெயராமைத் திருமணம் செய்து கொண்டார்.

இவர்களுக்கு சரண்யா என்ற மகளும், சாந்தனு என்ற மகனும் உள்ளனர்.

சாந்தனு தற்போது தமிழ் சினிமாவில் நடிகராக வலம் வருகிறார்.

தமிழ் சினிமாவின் இந்தச் சாதனை கலைஞர், இன்று (ஜூன் 27, 2026) தனது 73-வது வயதில் மாரடைப்பால் இயற்கை எய்தினார்.

இவரது மறைவு தமிழ் திரையுலகிற்கு ஒரு பேரிழப்பாகும்.

சினிமாவில் பிரம்மாண்டமான செட்டிங்க்குகளோ, சண்டைக் காட்சிகளோ இல்லாமல், வெறும் சுவாரசியமான திரைக்கதையையும் வசனத்தையும் மட்டுமே நம்பிப் படங்களை வெற்றி பெறச் செய்ய முடியும் என்று நிரூபித்தவர் பாக்யராஜ்.

தமிழ் சினிமா இருக்கும் வரை, அதன் திரைக்கதை இலக்கணத்திற்குள் கே. பாக்யராஜின் பெயர் என்றும் நிலைத்திருக்கும்.

Hindusthan Samachar / vidya.b