சென்னை , 28 ஜூன் (ஹி.ச.)

தமிழகத்தில் குழந்தைகளுக்கான போலியோ தடுப்பு சொட்டு மருந்து வழங்கும் தீவிர முகாம் இன்று அனைத்து மாவட்டங்களிலும் வெகு விமரிசையாக நடைபெற்றது.

மாநில அரசின் சார்பில் நடத்தப்படும் இந்த முகாம்களை மாவட்டங்கள் தோறும் அமைச்சர்கள் நேரடியாகச் சென்று தொடங்கி வைத்தனர்.

ஈரோடு மாவட்டம் கோபிச்செட்டிபாளையம் பேருந்து நிலையத்தில் அமைக்கப்பட்டிருந்த சிறப்பு முகாமில், வருவாய்த் துறை அமைச்சர் கே.ஏ. செங்கோட்டையன் குழந்தைகளுக்கு போலியோ சொட்டு மருந்து வழங்கி முகாமை முறைப்படி தொடங்கி வைத்தார்.

அப்போது பெற்றோர்களிடம், ஐந்து வயதுக்குட்பட்ட அனைத்து குழந்தைகளுக்கும் தவறாமல் சொட்டு மருந்து வழங்க வேண்டும் என்று அவர் கேட்டுக்கொண்டார்.

இதேபோல விருதுநகர் மாவட்டத்தில், விருதுநகர் அரசு ஆரம்ப சுகாதார நிலையத்தில் நடைபெற்ற முகாமை சமூக நலத்துறை அமைச்சர் ஜெகதீஸ்வரி தொடங்கி வைத்தார்.

குழந்தைகளுக்கு தாமே சொட்டு மருந்து புகட்டிய அமைச்சர், போலியோ இல்லாத தமிழகத்தை உருவாக்க அனைவரும் ஒத்துழைக்க வேண்டும் என்று வலியுறுத்தினார்.

கோயம்புத்தூர் அரசு மருத்துவமனை வளாகத்தில் நடைபெற்ற முகாமை தொழில்துறை அமைச்சர் சம்பத்குமார் தொடங்கி வைத்தார்.

மாவட்டம் முழுவதும் 1,800க்கும் மேற்பட்ட மையங்களில் சொட்டு மருந்து வழங்க ஏற்பாடு செய்யப்பட்டுள்ளதாகவும், காலை 7 மணி முதல் மாலை 5 மணி வரை முகாம்கள் செயல்படும் என்றும் அவர் தெரிவித்தார்.

பொது சுகாதாரத்துறை சார்பில் மாநிலம் முழுவதும் 43,000க்கும் மேற்பட்ட மையங்கள் அமைக்கப்பட்டு சுமார் 70 லட்சம் குழந்தைகளுக்கு சொட்டு மருந்து வழங்க இலக்கு நிர்ணயிக்கப்பட்டுள்ளது.

பேருந்து நிலையங்கள், ரயில் நிலையங்கள், விமான நிலையங்கள், வழிபாட்டுத் தலங்கள் மற்றும் பொதுமக்கள் கூடும் இடங்களிலும் சிறப்பு மையங்கள் அமைக்கப்பட்டுள்ளன.

போலியோ ஒழிப்பில் தமிழகம் தொடர்ந்து முன்னணி மாநிலமாக திகழ்வதாகவும், இந்த முகாம் மூலம் நோய் முற்றிலும் ஒழிக்கப்படும் என்றும் சுகாதாரத்துறை அதிகாரிகள் நம்பிக்கை தெரிவித்தனர்.

Hindusthan Samachar / vidya.b