வாஷிங்டன், 04 ஜூன் (ஹி.ச)

அமெரிக்கா முழுவதும் நிலக்கரி வசதிகளை வலுப்படுத்த, பனிப்போர் கால தேசிய பாதுகாப்பு அதிகாரங்களை பயன்படுத்தி $700 மில்லியன் ஒதுக்க திட்டமிட்டுள்ளதாக அதிபர் டொனால்ட் டிரம்ப் தெரிவித்துள்ளார்.

வெள்ளை மாளிகை வட்டாரங்களின்படி, இன்று இதற்கான அதிகாரப்பூர்வ அறிவிப்பு வெளியாகும் என தெரிகிறது.

டிரம்ப், 1950-ஆம் ஆண்டின் பாதுகாப்பு உற்பத்திச் சட்டத்தைப் பயன்படுத்தி, ஏற்கனவே உள்ள டஜன் கணக்கான நிலக்கரி மின் நிலையங்களில் பெரிய அளவிலான மேம்பாட்டுப் பணிகளுக்கு அங்கீகாரம் அளிக்க உள்ளார்.

இதனுடன், மேற்கு கடற்கரையில் மாபெரும் நிலக்கரி ஏற்றுமதி முனையம் அமைப்பதற்கான முதலீடுகளும் இதில் அடங்கும். புதிய மின் நிலையங்களை உருவாக்கும் நிறுவன முதலீடுகளுக்கு இணையாக நிதி ஒதுக்கவும் இந்த தொகையில் ஒரு பகுதி பயன்படுத்தப்படும்.

எரிசக்தி பாதுகாப்பு மற்றும் வெளிநாட்டு புதைபடிவ எரிபொருள்களைச் சார்ந்திருப்பதைக் குறைப்பது ஆகியவற்றை இந்த முயற்சிக்கான முதன்மை நியாயங்களாக டிரம்ப் நிர்வாகம் முன்வைத்துள்ளது.

அமெரிக்காவில் நிலக்கரி பயன்பாடு குறைந்து வரும் நிலையில் இந்த அறிவிப்பு வெளியாகியுள்ளது.

மின் உற்பத்தியில் பாதிக்கும் மேலாக இருந்த நிலக்கரி, தற்போது ஐந்தில் ஒரு பங்குக்கும் குறைவாகவே உள்ளது. ஆயினும், தரவு மையங்கள் போன்ற அதிக எரிசக்தி தேவைப்படும் துறைகளுக்கு நிலக்கரி இன்றியமையாதது என நிர்வாகம் கூறியுள்ளது.

முன்மொழியப்பட்ட நிதி ஒதுக்கீட்டில், மின் நிலைய மேம்பாடுகளுக்கு $350 மில்லியனுக்கும் அதிகமாகவும், குறிப்பிட்ட மாநிலங்களில் உள்ள திட்டங்களுக்கு $185 மில்லியனும், முன்மொழியப்பட்ட வெஸ்ட் கேட்வே ஏற்றுமதி முனையத்திற்கு $75 மில்லியனும் ஒதுக்கப்படும் என தெரிகிறது.

Hindusthan Samachar / vidya.b