சேலம், 05 ஜூன் (ஹி.ச.)

காவிரி நீர்ப்பிடிப்பு பகுதிகளில் பெய்து வரும் மழையின் காரணமாக மேட்டூர் அணையின் நீர்மட்டம் தொடர்ந்து உயர்ந்து வருகிறது.

கடந்த 24 மணி நேரத்தில் அணைக்கு வரும் நீரின் அளவு வினாடிக்கு 2,137 கன அடியில் இருந்து 1,454 கன அடியாக சரிந்துள்ள போதிலும், அணையின் நீர்மட்டம் 79.84 அடியில் இருந்து 79.86 அடியாக உயர்ந்துள்ளது.

இதனால் அணையின் மொத்த நீர் இருப்பு இன்று காலை நிலவரப்படி 41.81 டிஎம்சி ஆக பதிவாகியுள்ளது. நீர்வரத்து குறைந்திருந்தாலும், வெளியேற்றப்படும் நீரின் அளவைவிட வரத்து அதிகமாக இருப்பதால் நீர்மட்டத்தில் சிறிய அளவிலான உயர்வு ஏற்பட்டுள்ளதாக நீர்வளத்துறை அதிகாரிகள் தெரிவித்தனர்.

இதற்கிடையில், காவிரி டெல்டா மாவட்டங்களின் குடிநீர் தேவைக்காக மேட்டூர் அணையில் இருந்து வினாடிக்கு 1,000 கன அடி நீர் தொடர்ந்து வெளியேற்றப்பட்டு வருகிறது.

பாசனத்துக்கு தண்ணீர் திறப்பு இன்னும் தொடங்கப்படாத நிலையில், குடிநீர் தேவைக்கு மட்டுமே நீர் வெளியேற்றப்படுகிறது.

முழு கொள்ளளவான 120 அடியை எட்ட இன்னும் 40 அடிக்கு மேல் தேவைப்பட்டாலும், தற்போதைய நீர்வரத்து தொடரும் பட்சத்தில் வரும் நாட்களில் நீர்மட்டம் மேலும் உயர வாய்ப்புள்ளதாக எதிர்பார்க்கப்படுகிறது.

விவசாயிகளும் பொதுமக்களும் அணையின் நீர்மட்ட உயர்வை உன்னிப்பாக கவனித்து வருகின்றனர்.

Hindusthan Samachar / vidya.b