லக்னோ , 01 ஜூலை (ஹி.ச.)

உத்தரப் பிரதேச மாநிலம் கோண்டா மாவட்டத்தில் உள்ள உம்ரி கிராமத்தில் மாமியாரின் இறுதிச் சடங்கில் கலந்து கொள்ள வந்த வாலிபர் ஒருவர், ஆற்றில் குளிக்கச் சென்றபோது முதலை தாக்கி இழுத்துச் சென்ற சம்பவம் பரபரப்பை ஏற்படுத்தியுள்ளது.

கிரேட்டர் நொய்டா பகுதியை சேர்ந்த தீபக் சர்மா (வயது விவரம் தெரியவில்லை) என்பவர், தனது மனைவியின் தாயார் ஊர்மிளா தேவி மறைவையடுத்து நடைபெற்ற இறுதிச் சடங்கில் கலந்து கொள்வதற்காக உம்ரி கிராமத்திற்கு வந்திருந்தார்.

இறுதிச் சடங்குகள் நிறைவடைந்த பின்னர், சடலத்தை எரிப்பதற்காக ஆற்றங்கரையிலுள்ள மயானத்திற்கு உறவினர்கள் கொண்டு சென்றனர்.

அப்போது உடன் சென்ற தீபக் சர்மா ஆற்றில் இறங்கி குளிக்க முயன்றதாக கூறப்படுகிறது.

கிராம மக்கள் ஆபத்து இருப்பதாக எச்சரித்தும் அவர் அதை பொருட்படுத்தாமல் ஆற்றில் இறங்கியதாக தெரிவிக்கப்படுகிறது.

அந்த சமயத்தில் திடீரென நீருக்குள் இருந்து வெளிப்பட்ட முதலை ஒன்று தீபக் சர்மாவை கடித்து ஆற்றுக்குள் இழுத்துச் சென்றது.

இதைக் கண்டு அதிர்ச்சியடைந்த கிராம மக்கள் உடனடியாக காவல்துறையினருக்கும் மீட்புப் படையினருக்கும் தகவல் தெரிவித்தனர்.

தகவலறிந்து சம்பவ இடத்திற்கு விரைந்த போலீசார் மற்றும் மீட்புப் படையினர் தீபக் சர்மாவை தேடும் பணியில் ஈடுபட்டனர்.

பின்னர் மாநில பேரிடர் மீட்புப் படை வீரர்களும் வரவழைக்கப்பட்டு தேடுதல் பணி தீவிரப்படுத்தப்பட்டுள்ளது.

இதுவரை தீபக் சர்மாவின் உடல் கிடைக்காத நிலையில், தொடர்ந்து தேடுதல் நடைபெற்று வருவதாக அதிகாரிகள் தெரிவித்துள்ளனர்.

இந்த சம்பவம் அப்பகுதியில் பெரும் சோகத்தையும் அதிர்ச்சியையும் ஏற்படுத்தியுள்ளது.

Hindusthan Samachar / M.DEEPAK RAJA