புதுடெல்லி, 15 ஜூலை (ஹி.ச.)

இந்தியா–இங்கிலாந்து இடையிலான முழுமையான பொருளாதார மற்றும் வர்த்தக ஒப்பந்தம் (Comprehensive Economic and Trade Agreement - CETA) மற்றும் சமூகப் பாதுகாப்பு ஒப்பந்தம் (Agreement on Social Security) நடைமுறைக்கு வந்துள்ளதை முன்னிட்டு, பிரதமர் நரேந்திர மோடி தனது எக்ஸ் தளத்தில் முக்கிய பதிவொன்றை வெளியிட்டுள்ளார்.

அதில், இந்த இரு ஒப்பந்தங்களும் இந்தியா–இங்கிலாந்து உறவில் முக்கியமான மைல்கல்லாக அமையும் என்றும், இரு நாடுகளின் பொருளாதார உறவுகளை மேலும் வலுப்படுத்தும் என்றும் அவர் குறிப்பிட்டுள்ளார்.

இந்த ஒப்பந்தங்கள், இரு நாடுகளின் பொதுவான இலக்குகளை மக்களுக்கு நேரடி பலன் அளிக்கும் வகையில் செயல்படுத்தும் முயற்சியாகும் என்றும் தெரிவித்துள்ளார்.

குறிப்பாக, CETA ஒப்பந்தம் இந்திய விவசாயிகள், தொழில்முனைவோர் மற்றும் சிறு, குறு, நடுத்தர தொழில் நிறுவனங்களுக்கு (MSME) புதிய ஏற்றுமதி வாய்ப்புகளை உருவாக்கும் என்று பிரதமர் மோடி கூறியுள்ளார்.

இந்தியாவின் பல்வேறு உற்பத்தித் துறைகளுக்கு இங்கிலாந்து சந்தையில் கூடுதல் அணுகல் கிடைக்கும் என்றும், தொழில்நுட்பம், தொழில்முறை சேவைகள், புதுமை (Innovation) உள்ளிட்ட துறைகளில் இருநாடுகளின் ஒத்துழைப்பு மேலும் விரிவடையும் என்றும் அவர் தெரிவித்துள்ளார்.

மேலும், திறமையான இந்திய நிபுணர்கள் இங்கிலாந்தில் தற்காலிகமாக பணியாற்றுவதற்கான வாய்ப்புகளை இந்த ஒப்பந்தம் மேம்படுத்தும் என்றும், இந்திய நிறுவனங்களின் உலகளாவிய போட்டித்திறனையும் உயர்த்தும் என்றும் அவர் கூறியுள்ளார்.

அதேபோல், சமூகப் பாதுகாப்பு ஒப்பந்தம் இங்கிலாந்தில் தற்காலிகமாக பணிபுரியும் இந்திய தொழில்முறை நிபுணர்களுக்கு முக்கியமான பாதுகாப்பை வழங்கும் என்றும், இரட்டை சமூகப் பாதுகாப்பு பங்களிப்பு போன்ற சுமைகளை குறைத்து, இந்திய நிறுவனங்களுக்கு நன்மை அளிக்கும் என்றும் பிரதமர் தெரிவித்துள்ளார்.

இறுதியாக, இந்தியா மற்றும் இங்கிலாந்து ஆகிய இரு ஜனநாயக நாடுகளுக்கும் இடையிலான பரஸ்பர நம்பிக்கையின் வெளிப்பாடாக இந்த ஒப்பந்தங்கள் அமைந்துள்ளன என்றும், வர்த்தகம், தொழில்நுட்பம், முதலீடு மற்றும் புதுமையை மையமாகக் கொண்டு இரு நாடுகளும் பகிர்ந்த செழிப்பை நோக்கி தொடர்ந்து இணைந்து செயல்படும் என்று பிரதமர் மோடி தனது பதிவில் வலியுறுத்தியுள்ளார்.

Hindusthan Samachar / VINOTH KUMAR P