புதுடெல்லி, 16 ஜூலை (ஹி.ச.)

வரவிருக்கும் நாடாளுமன்ற மழைக்கால கூட்டத்தொடரில் மத்திய பாஜக அரசை பல்வேறு முக்கிய பிரச்சினைகளில் கடுமையாகக் கேள்வி எழுப்பி பொறுப்பேற்கச் செய்வோம் என்று காங்கிரஸ் தேசிய தலைவர் மல்லிகார்ஜுன் கார்கே தெரிவித்துள்ளார்.

இதுதொடர்பாக எக்ஸ் (X) சமூக வலைதளத்தில் அவர் வெளியிட்ட பதிவில்,

நாட்டின் மக்கள் வாழ்க்கை, இளைஞர்களின் எதிர்காலம் மற்றும் ஜனநாயக அமைப்புகளை பாதிக்கும் பல்வேறு முக்கிய விவகாரங்கள் குறித்து காங்கிரஸ் நாடாளுமன்றக் கட்சி (CPP) கூட்டத்தில் விரிவாக ஆலோசிக்கப்பட்டதாக குறிப்பிட்டுள்ளார்.

கார்கே தனது பதிவில், திருப்பதி உள்ளிட்ட கோயில்களில் காணிக்கை நிதி தொடர்பான மோசடி, நாடு முழுவதும் தொடர்ந்து நடைபெறும் தேர்வுத் தாள் கசிவுகள், கல்வி அமைப்பில் ஏற்பட்டுள்ள முறைகேடுகள் மற்றும் அமைப்புசார் சீரழிவு, அரசு அமைப்புகள் அரசியல் கட்டுப்பாட்டுக்குள் கொண்டு வரப்படுவது, அரசியல் கட்சிகளை உடைக்கும் நடவடிக்கைகள், பல்வேறு ஊழல் குற்றச்சாட்டுகள், அத்தியாவசிய பொருட்களின் கடுமையான விலை உயர்வு, இந்தியாவின் வெளியுறவுக் கொள்கை தோல்விகள் மற்றும் மூலோபாய தவறுகள், 3.5 கோடி வாகன உரிமையாளர்களை பாதிக்கும் எத்தனால் கலப்பு எரிபொருள் கொள்கை, கட்டுப்பாடற்ற வன அழிப்பு, மேலும் பட்டியலினத்தவர் (SC), பழங்குடியினர் (ST), இதர பிற்படுத்தப்பட்டோர் (OBC) மற்றும் சிறுபான்மையினரின் உரிமைகள் மீதான தொடர்ச்சியான தாக்குதல்கள் ஆகியவை மழைக்கால கூட்டத்தொடரில் எழுப்பப்படவுள்ள முக்கிய பிரச்சினைகள் என தெரிவித்துள்ளார்.

மேலும், இந்த விவகாரங்கள் வெறும் அரசியல் விவாதங்கள் அல்ல; கோடிக்கணக்கான மக்களின் அன்றாட வாழ்க்கை, வேலைவாய்ப்பு, கல்வி, சமூக நீதி மற்றும் எதிர்கால நம்பிக்கையுடன் நேரடியாக தொடர்புடையவை என்றும் கார்கே வலியுறுத்தியுள்ளார்.

மக்களின் வாழ்வாதாரத்தை பாதிக்கும் இந்த பிரச்சினைகள் குறித்து மோடி அரசு நாடாளுமன்றத்தில் பதிலளிக்க வேண்டும்.

அரசை பொறுப்பேற்கச் செய்வதே காங்கிரஸின் நோக்கம் என்றும் அவர் தனது பதிவில் தெரிவித்துள்ளார்.

இந்த நிலையில், வரவிருக்கும் மழைக்கால நாடாளுமன்ற கூட்டத்தொடரில் ஆளும் பாஜக அரசுக்கும் எதிர்க்கட்சிகளுக்கும் இடையே விலைவாசி உயர்வு, தேர்வுத் தாள் கசிவு, சமூக நீதி, வெளியுறவுக் கொள்கை, எத்தனால் கலப்பு திட்டம் உள்ளிட்ட பல்வேறு விவகாரங்களை மையமாகக் கொண்டு கடும் விவாதங்கள் நடைபெற வாய்ப்புள்ளதாக அரசியல் வட்டாரங்கள் கருதுகின்றன.

Hindusthan Samachar / VINOTH KUMAR P