வாஷிங்டன், 16 ஜூலை (ஹி.ச.)

அமெரிக்க ராணுவத்தில் 30 வயதுக்கு மேற்பட்ட வீரர்களுக்கு ஆண்டுதோறும் கட்டாய டெஸ்டோஸ்டிரோன் பரிசோதனை நடத்தப்பட வேண்டும் என பாதுகாப்புத் துறை செயலாளர் பீட் ஹெக்செத் உத்தரவிட்டுள்ளார்.

டெஸ்டோஸ்டிரோன் குறைபாட்டைக் கண்டறிந்து அதற்கான சிகிச்சையை வழங்குவதன் மூலம் வீரர்களின் உடல்நலத்தையும் செயல்திறனையும் பாதுகாப்பதே இந்த நடவடிக்கையின் நோக்கம் என தெரிவிக்கப்பட்டுள்ளது.

இந்தப் பரிசோதனையில் குறைபாடு கண்டறியப்படுபவர்களுக்கு ஹார்மோன் மாற்று சிகிச்சைகள் வழங்கப்படலாம் எனவும் கூறப்படுகிறது.

வயது தொடர்பான காரணங்களால் டெஸ்டோஸ்டிரோன் அளவு குறையும் ஆண்களுக்கான டெஸ்டோஸ்டிரோன் சிகிச்சைகள் மீதான கட்டுப்பாடுகளைத் தளர்த்த அமெரிக்க சுகாதாரம் மற்றும் மனித சேவைகள் துறை சமீபத்தில் முயற்சிகளை மேற்கொண்டு வரும் நிலையில், இந்த அறிவிப்பு வெளியாகியுள்ளது.

அதேவேளை, இந்த முடிவு சர்ச்சையையும் ஏற்படுத்தியுள்ளது.

திருநங்கைகளான ராணுவ வீரர்கள் ஹார்மோன் சிகிச்சை பெறுவதற்கு எதிராக ஹெக்செத் முன்பு கடுமையான நிலைப்பாட்டை எடுத்திருந்த நிலையில், தற்போதைய இந்த உத்தரவு முரண்பாடானது என ஜனநாயகக் கட்சித் தலைவர்கள் விமர்சித்துள்ளனர்.

காங்கிரஸ் உறுப்பினர் சம்மர் லீ மற்றும் செனட்டர் டாமி டக்வொர்த் ஆகியோர் இந்தக் கொள்கை பாலின உறுதிப்படுத்தும் சிகிச்சைக்கு எதிரான நிலைப்பாட்டுடன் எவ்வாறு பொருந்துகிறது என கேள்வி எழுப்பியுள்ளனர்.

Hindusthan Samachar / vidya.b