ஆப்கானிஸ்தான், 02 ஜூலை (ஹி.ச.)

ஆப்கானிஸ்தானின் வடகிழக்கு பகுதியில் உள்ள படாக்ஷான் மாகாணத்தின் ஜுர்ம் நகருக்கு அருகே இன்று 5.5 ரிக்டர் அளவில் நிலநடுக்கம் ஏற்பட்டதாக அமெரிக்க புவியியல் ஆய்வு மையம் தெரிவித்துள்ளது.

இந்த நிலநடுக்கம் பூமியின் மேற்பரப்பில் இருந்து சுமார் 216.7 கிலோமீட்டர் ஆழத்தில் ஏற்பட்டுள்ளது. இவ்வளவு ஆழத்தில் ஏற்பட்டதால், மேற்பரப்பில் அதிர்வின் தாக்கம் குறைவாகவே இருந்திருக்கும் என நிபுணர்கள் கூறுகின்றனர்.

முதற்கட்ட தகவல்களின்படி, உயிர்ச்சேதமோ பொருட்சேதமோ எதுவும் உடனடியாக பதிவாகவில்லை.

இந்திய மற்றும் யூரேசிய நிலத்தட்டுகள் மோதும் பகுதியில் ஆப்கானிஸ்தான் அமைந்துள்ளதால், உலகளவில் அதிக நிலநடுக்க அபாயம் கொண்ட நாடுகளில் ஒன்றாக அது திகழ்கிறது.

கடந்த 2025 ஆம் ஆண்டில் ஏற்பட்ட கோர நிலநடுக்கத்தில் 2,200க்கும் மேற்பட்டோர் உயிரிழந்தனர்.

அந்த பேரழிவு நிகழ்ந்து சில மாதங்களே ஆன நிலையில் இந்த நிலநடுக்கம் ஏற்பட்டுள்ளது. இது அப்பகுதியில் தொடரும் நில அதிர்வு அபாயத்தை மீண்டும் உணர்த்தியுள்ளது.

பொதுவாக 200 கிலோமீட்டருக்கும் அதிகமான ஆழத்தில் ஏற்படும் நிலநடுக்கங்கள் ஆழமானவை என வகைப்படுத்தப்படுகின்றன.

இவற்றின் அதிர்வலைகள் மேலே வருவதற்குள் பலவீனமடைவதால், மேற்பரப்பில் பெரிய சேதம் ஏற்படுவது குறைவு.

எனினும், தொடர்ச்சியான நில அதிர்வுகள் அப்பகுதி மக்களிடையே அச்சத்தை ஏற்படுத்தியுள்ளன. தற்போதைக்கு மீட்பு குழுக்கள் நிலைமையை கண்காணித்து வருகின்றன

Hindusthan Samachar / vidya.b