ரம்பசோடவரம் , 24 ஜூலை (ஹி.ச.)

ஆந்திர மாநிலத்தில் பழங்குடியினர் பகுதிகளில் சொந்த கட்டிடங்கள் இல்லாத அனைத்து அரசு பள்ளிகளுக்கும் அடுத்த ஆண்டுக்குள் புதிய கட்டிடங்கள் கட்டப்படும் என்று மாநில கல்வித்துறை அமைச்சர் நாரா லோகேஷ் தெரிவித்தார்.

மேலும், பழுதடைந்த பள்ளிக் கட்டிடங்கள் நவீன வசதிகளுடன் சீரமைக்கப்படும் என்றும் அவர் கூறினார்.

போலவரம் மாவட்டம் ரம்பசோடவரம் அரசு மேல்நிலைப்பள்ளியில் நடைபெற்ற மெகா பெற்றோர்-ஆசிரியர் சந்திப்பு நிகழ்ச்சியில் முதலமைச்சர் சந்திரபாபு நாயுடுவுடன் கலந்து கொண்ட அமைச்சர் லோகேஷ், அரசு பள்ளிகளில் மேற்கொள்ளப்பட்டு வரும் சீர்திருத்த நடவடிக்கைகள் குறித்து பேசினார்.

அப்போது அவர் கூறியதாவது:-

அரசு பள்ளிகளின் தரத்தை உயர்த்த எடுத்த நடவடிக்கைகளின் காரணமாக, இந்த ஆண்டு மட்டும் தனியார் பள்ளிகளில் இருந்து 1.10 லட்சம் மாணவர்கள் அரசு பள்ளிகளில் சேர்ந்துள்ளனர்.

அரசு பள்ளிகள் மீது பெற்றோர்களின் நம்பிக்கை அதிகரித்துள்ளது.

ஆசிரியர்கள், பெற்றோர்கள் மற்றும் மாணவர்களின் கூட்டு முயற்சியால் இந்த மாற்றம் ஏற்பட்டுள்ளது.

கல்வித்துறையில் பல்வேறு சீர்திருத்தங்கள் மேற்கொள்ளப்பட்டு வருகின்றன. ‘தாய்க்கு வணக்கம்’ திட்டத்தின் கீழ், ஒரு குடும்பத்தில் எத்தனை குழந்தைகள் படித்தாலும் அனைவருக்கும் நிதியுதவி வழங்கப்படுகிறது. 2025-ம் ஆண்டில் 67.27 லட்சம் மாணவர்களுக்கு ரூ.10,090 கோடியும், 2026-ம் ஆண்டில் 67.47 லட்சம் மாணவர்களுக்கு ரூ.10,120 கோடியும் வழங்கப்பட்டுள்ளது.

மேலும், மெகா டிஎஸ்சி தேர்வு மூலம் 16 ஆயிரம் ஆசிரியர் பணியிடங்கள் நிரப்பப்பட்டுள்ளன.

ஆசிரியர் இடமாற்றத்திற்காக வெளிப்படையான சட்டமும் கொண்டு வரப்பட்டுள்ளது.

மாணவர்களுக்கு வழங்கப்படும் மதிய உணவு திட்டம் ‘டொக்கா சீதம்மா’ பெயரில், அந்தந்த பகுதிகளின் உணவு முறைக்கு ஏற்ப செயல்படுத்தப்பட்டு வருகிறது. விரைவில் மாநிலம் முழுவதும் ஸ்மார்ட் சமையலறைகள் அமைக்கப்படும்.

மாணவர்களின் முழுமையான வளர்ச்சிக்காக கல்வி உபகரணங்கள் வழங்கப்பட்டு வருவதுடன், சனிக்கிழமைகளில் ‘பை இல்லா நாள்’ திட்டமும் நடைமுறைப்படுத்தப்பட்டுள்ளது.

மாணவர்களுக்கு மதிப்புகளுடன் கூடிய கல்வியை வழங்குவதே அரசின் முக்கிய நோக்கம் என்று அமைச்சர் லோகேஷ் தெரிவித்தார்.

இதற்காக பிரபல ஆன்மிக பேச்சாளர் சாகண்டி கோட்டேஸ்வர ராவ் கல்வி ஆலோசகராக நியமிக்கப்பட்டுள்ளதாகவும், மாணவர்களிடம் நல்லொழுக்கத்தை வளர்க்க நடவடிக்கை எடுக்கப்பட்டு வருவதாகவும் அவர் கூறினார்.

பெண்களை அவமதிக்கும் செயல்களை அரசு ஒருபோதும் அனுமதிக்காது என்றும், பெண்களுக்கு எதிரான குற்றங்களில் கடும் நடவடிக்கை எடுக்கப்படும் என்றும் அமைச்சர் தெரிவித்தார்.

டாக்டர் ஏ.பி.ஜே. அப்துல் கலாமின் வாழ்க்கையில் தாய் மற்றும் ஆசிரியரின் பங்கு முக்கியமானது என்பதை நினைவுகூர்ந்த அவர், ஒவ்வொரு வெற்றிகரமான மனிதரின் பின்னாலும் ஒரு சிறந்த தாயும், ஒரு சிறந்த ஆசிரியரும் இருப்பார்கள் என்றார்.

இந்த ஆண்டு 10-ம் வகுப்பு மற்றும் இடைநிலை தேர்வுகளில் அரசு பள்ளி மாணவர்கள் சாதனை படைத்துள்ளனர்.

அரசு பள்ளி மாணவர்களின் சாதனைகள் மக்களிடம் நம்பிக்கையை ஏற்படுத்தியுள்ளதாகவும் அமைச்சர் லோகேஷ் கூறினார்.

“மாணவர்களின் மதிப்பெண்களே எனது முன்னேற்ற அறிக்கை.

நீங்கள் நன்றாக படித்தால் முதலமைச்சர் எனக்கு நல்ல மதிப்பெண் வழங்குவார். எனது எதிர்காலம் உங்கள் கைகளில் உள்ளது” என்று மாணவர்களிடம் அமைச்சர் லோகேஷ் தெரிவித்தார்.

Hindusthan Samachar / M.DEEPAK RAJA