புதுடெல்லி, 26 ஜூலை (ஹி.ச.)

அமெரிக்கா, Trade Act 1974-ன் Section 301 விதிகளின் கீழ் இந்தியா உள்ளிட்ட 60 நாடுகளின் பொருட்களுக்கு கூடுதலாக 10% சுங்க வரி விதித்துள்ளது.

இருப்பினும், இந்தியாவுக்கு இது முழுமையான பாதிப்பை ஏற்படுத்தாது என மத்திய வர்த்தக மற்றும் தொழில் அமைச்சகம் தெரிவித்துள்ளது.

காரணம், அமெரிக்காவுக்கு இந்தியா ஏற்றுமதி செய்யும் பொருட்களில் சுமார் 45% இந்த கூடுதல் 10% சுங்க வரியின் வரம்புக்குள் வராது என்பதே ஆகும்.

அமெரிக்கா முதலில் இந்தியாவுக்கு 12.5% கூடுதல் சுங்க வரி விதிக்க முன்மொழிந்திருந்தது.

ஆனால், இந்திய அரசு அமெரிக்க வர்த்தக பிரதிநிதி (USTR) உடன் தொடர்ந்து பேச்சுவார்த்தை நடத்தியதன் விளைவாக, இறுதி முடிவில் 10% என்ற குறைந்த சுங்க வரி நிலைக்கு இந்தியா கொண்டு வரப்பட்டது. இதனால், மற்ற பல நாடுகளை விட இந்திய ஏற்றுமதியாளர்களுக்கு போட்டி முன்னிலை கிடைத்துள்ளதாக அரசு கூறியுள்ளது.

எந்த பொருட்களுக்கு விலக்கு?

இந்த கூடுதல் 10% சுங்க வரி ஜெனரிக் மருந்துகள் (Generic Pharmaceuticals), ஸ்மார்ட்போன்கள் மற்றும் சில மின்னணு பொருட்கள் மீது பொருந்தாது. மேலும், ஏற்கனவே Section 232 விதிகளின் கீழ் தனி சுங்க வரி செலுத்தி வரும் எஃகு (Steel), அலுமினியம் (Aluminium), ஆட்டோ உதிரிபாகங்கள்

(Auto Parts) ஆகியவையும் இந்த புதிய வரியில் இருந்து விலக்கு பெறுகின்றன. இதன் காரணமாக இந்தியாவின் மொத்த ஏற்றுமதியில் 45% பாதிக்கப்படாமல் இருக்கும் என அரசு தெரிவித்துள்ளது.

ஆனால், மீதமுள்ள 55% ஏற்றுமதி பொருட்களுக்கு இந்த 10% கூடுதல் சுங்க வரி விதிக்கப்படும்.

குறிப்பாக ஜவுளி மற்றும் ஆடைத் துறை, தோல் பொருட்கள், நகைகள் உள்ளிட்ட தொழிலாளர் சார்ந்த ஏற்றுமதி துறைகள் இதனால் அதிக பாதிப்பை சந்திக்கக்கூடும் என ஏற்றுமதியாளர்கள் கவலை தெரிவித்துள்ளனர்.

இந்நிலையில், ஜவுளித் துறைக்கு சலுகை வழங்கும் தனி நடைமுறை இன்னும் இறுதி செய்யப்படவில்லை. இது தொடர்பாகவும், இந்தியா–அமெரிக்கா இருதரப்பு வர்த்தக ஒப்பந்தம் (Bilateral Trade Agreement - BTA) குறித்தும் இரு நாடுகளும் தொடர்ந்து பேச்சுவார்த்தை நடத்தி வருகின்றன.

இந்த ஒப்பந்தம் விரைவில் நிறைவேறினால், இந்திய ஏற்றுமதியாளர்களுக்கு கூடுதல் சந்தை வாய்ப்புகள் உருவாகும் என மத்திய அரசு நம்பிக்கை தெரிவித்துள்ளது.

Hindusthan Samachar / VINOTH KUMAR P