கேரளம், 08 ஜூலை (ஹி.ச.)

கேரள மாநிலம் வயநாடு மாவட்டம் கல்லடி பகுதியில் நடைபெற்று வந்த சுரங்கப்பாதை கட்டுமானப் பணியின் போது ஏற்பட்ட நிலச்சரிவில் உயிரிழந்தோரின் எண்ணிக்கை 5 ஆக உயர்ந்துள்ளது.

காணாமல் போனவர்களை மீட்கும் பணிகள் இரண்டாவது நாளாகவும் தீவிரமாக நடைபெற்று வருகின்றன.

கனமழையால் ஏற்பட்ட நிலச்சரிவில் தொழிலாளர்கள், பாதுகாப்பு பணியாளர்கள் மற்றும் மேற்பார்வை அதிகாரிகள் சிக்கினர்.

மீட்கப்பட்ட பலர் மருத்துவமனைகளில் சிகிச்சை பெற்று வரும் நிலையில், அவர்களில் 7 பேரின் உடல்நிலை கவலைக்கிடமாக இருப்பதாக தகவல்கள் தெரிவிக்கின்றன.

காணாமல் போனவர்களை கண்டுபிடிக்க மோப்ப நாய்கள் உதவியுடன் தேசிய மற்றும் மாநில பேரிடர் மீட்புப் படையினர் தொடர்ந்து தேடுதல் பணியில் ஈடுபட்டு வருகின்றனர்.

மோசமான வானிலை நிலவினாலும் மீட்புப் பணிகள் இடையூறு இல்லாமல் நடைபெற்று வருகின்றன.

மீட்கப்பட்ட 5 பேரின் உடல்கள் கோழிக்கோடு அரசு மருத்துவக் கல்லூரி மருத்துவமனைக்கு கொண்டு செல்லப்பட்டு, பிரேதப் பரிசோதனை நிறைவு செய்யப்பட்டுள்ள நிலையில், அவர்களின் சொந்த ஊர்களுக்கு அனுப்பி வைக்கப்பட உள்ளன.

இதற்கிடையில், நிலச்சரிவுக்கு கட்டுமான ஒப்பந்த நிறுவனத்தின் அலட்சியமே காரணம் என்ற குற்றச்சாட்டுகள் எழுந்துள்ளன.

மேலும், ஒப்பந்த நிறுவனத்தைச் சேர்ந்த சில ஊழியர்கள் காணாமல் போயிருப்பதாகவும் தகவல்கள் வெளியாகியுள்ளன.

நிலச்சரிவு பாதித்த பகுதிக்கு அருகில் வசித்த பொதுமக்கள் பாதுகாப்பு கருதி அரசு தொடக்கப்பள்ளி மற்றும் நிவாரண முகாம்களுக்கு மாற்றப்பட்டுள்ளனர்.

இந்தச் சம்பவம் தொடர்பாக கேரள முதலமைச்சர் இன்று பிற்பகல் சம்பவ இடத்தை நேரில் பார்வையிட்டு, மீட்பு மற்றும் நிவாரணப் பணிகளை ஆய்வு செய்ய உள்ளார்.

Hindusthan Samachar / VINOTH KUMAR P