சென்னை, 12 ஆகஸ்ட் (ஹி.ச.)

திரை நட்சத்திரங்கள், பிரபலங்கள் மற்றும் சமூக வலைதள இன்ஃப்ளூயன்ஸர்கள் உணவுப் பொருட்களை விளம்பரப்படுத்தும்போது, அந்தப் பொருள் தொடர்பாக கூறப்படும் தகவல்கள் உண்மையானவை, சட்டத்திற்கு உட்பட்டவை மற்றும் உரிய ஆதாரங்களுடன் கூடியவை என்பதை உறுதி செய்ய வேண்டும் என இந்திய உணவுப் பாதுகாப்பு மற்றும் தர நிர்ணய ஆணையம் (FSSAI) எச்சரித்துள்ளது.

உணவுப் பாதுகாப்பு மற்றும் தரநிலைகள் சட்டம், 2006-ன் பிரிவுகள் 24 மற்றும் 53 மற்றும் விளம்பரங்கள் மற்றும் கோரிக்கைகள் விதிகள், 2018-ன் கீழ், நுகர்வோரைத் தவறாக வழிநடத்தும் உணவு விளம்பரங்கள் சட்டப்படி தடை செய்யப்பட்டுள்ளன.

குறிப்பாக, “நோய் எதிர்ப்பு சக்தியை அதிகரிக்கும்”, “ஊட்டச்சத்துக்கள் நிறைந்தது” போன்ற அறிவியல் ஆதாரங்கள் இல்லாத வாக்குறுதிகளை விளம்பரப்படுத்துவதைத் தவிர்க்க வேண்டும் என அறிவுறுத்தப்பட்டுள்ளது.

ஒரு நிறுவனத்தின் விளம்பரத்தில் நடிக்கவோ அல்லது ஒப்பந்தம் மேற்கொள்ளவோ முன்பாக, அந்த உணவுப் பொருள் தொடர்பான தகவல்கள் FSSAI விதிகளுக்கு உட்பட்டவையா, நுகர்வோரை தவறாக வழிநடத்துகிறதா என்பதை பிரபலங்கள் மற்றும் இன்ஃப்ளூயன்ஸர்கள் சரிபார்க்க வேண்டும்.

ஆதாரமற்ற மற்றும் தவறான உணவு விளம்பரங்களை ஊக்குவிப்பது சட்ட நடவடிக்கை மற்றும் அபராதத்திற்கு வழிவகுக்கும் என யூட்யூப், இன்ஸ்டாகிராம் உள்ளிட்ட சமூக வலைதளங்களில் செயல்படும் இன்ஃப்ளூயன்ஸர்களுக்கு FSSAI கடுமையான எச்சரிக்கை விடுத்துள்ளது.

Hindusthan Samachar / P YUVARAJ