விருதுநகர், 14 ஆகஸ்ட் (ஹி.ச.)

ஸ்ரீ ஆண்டாள் நாச்சியார் தமிழ் ஆன்மீக வரலாற்றிலும், தமிழ் இலக்கிய உலகிலும் தனக்கென ஒரு தனித்துவமான இடத்தைப் பிடித்தவர்.

பன்னிரு ஆழ்வார்களில் வீற்றிருக்கும் ஒரே பெண் ஆழ்வாரான இவர், பக்தி நெறியின் மூலமாக இறைவனையே தன் வசப்படுத்திய உன்னத சரித்திரத்தைக் கொண்டவர்.

ஸ்ரீ ஆண்டாள், ஆடி மாத பூர நட்சத்திரத்தில், விருதுநகர் மாவட்டத்தில் உள்ள ஸ்ரீவில்லிபுத்தூரில் அவதரித்தார். இவர் பூமாதேவியின் அம்சமாகக் கருதப்படுகிறார்.

ஆண்டாள் அவதரித்த ஸ்ரீவில்லிபுத்தூரில் ஆடிப்பூரமான இன்று பிரம்மாண்டமான தேரோட்டம் நடைபெற்றது. இதில் பல்லாயிரக்கணக்கான பக்தர்கள் கலந்துகொண்டு தேரை வடம்பிடித்து இழுத்தனர்.

ஸ்ரீவில்லிபுத்தூர் வடபத்ரசாயி பெருமாள் கோவிலுக்குப் பூமாலை தொடுக்கும் கைங்கர்யம் செய்து வந்த பெரியாழ்வாருக்கு (விஷ்ணுசித்தர்), அங்கிருந்த துளசி நந்தவனத்தில் ஆண்டாள் ஒரு குழந்தையாகக் கண்டெடுக்கப்பட்டார்.

இவருக்குப் பெற்றோர் இட்ட பெயர் கோதை (இசை வடம் அல்லது பூமாலை என்று பொருள்). தன் தந்தை பெருமாளுக்காகத் தொடுக்கும் பூமாலைகளை, அவர் அறியாமல் கோதை முதலில் தன் கூந்தலில் சூடிப் பார்த்து அழகு பார்ப்பார். இந்த மாலை இறைவனுக்குப் பொருந்துமா, இறைவனுக்கு ஏற்ற மணவாட்டியாக நான் இருக்கிறேனா? என்று அறியவே இவ்வாறு செய்தார்.

ஒருநாள் இதைக் கண்ட பெரியாழ்வார் வருந்தி, வேறு மாலை தொடுத்து இறைவனுக்குச் சாத்தினார். ஆனால், இறைவன் கோதை சூடிய மாலையையே ஏற்றுக் கொண்டார். இதனால் இவருக்குச் சூடிக்கொடுத்த சுடர்க்கொடி என்று பெயர் வந்தது.

மானிடப் பிறவிகளை மணக்க மறுத்து, ஆதிபரம்பொருளான கண்ணனையே தன் கணவனாக எண்ணி, தனது தீராத பக்தியால் அகில உலகையும் ஆளும் இறைவனையே ஆண்டதால், இவருக்கு ஆண்டாள் என்ற திருநாமம் நிலைத்தது.

ஆண்டாள் நாச்சியார் அருளிய பாசுரங்கள் பக்திச் சுவையும், தமிழ்ச் சுவையும் நிறைந்தவை. நாலாயிர திவ்ய பிரபந்தத்தில் இவரது பாடல்கள் முக்கியப் பங்கு வகிக்கின்றன.

மார்கழி மாத நோன்பின் சிறப்பையும், கண்ணனை அடைந்து கைங்கர்யம் செய்யும் வழியையும் கூறும் 30 பாடல்களைக் கொண்ட உன்னத நூல். இது எளிய தமிழில் வேதாந்தக் கருத்துக்களை விளக்குகிறது.

143 பாடல்களைக் கொண்ட நாச்சியார் திருமொழி நூல், கண்ணன் மீதான அவரது தீவிர காதலையும், பிரிவாற்றாமையையும் விவரிக்கிறது. இதில் உள்ள வாரணமாயிரம் பதிகம், ஆண்டாள் தான் கண்ணனைத் திருமணம் செய்துகொள்வதாகக் கண்ட உன்னத கனவை விவரிக்கிறது.

இன்றும் வைணவத் திருமணங்களில் இது முதன்மையாகப் பாடப்படுகிறது. இறைவனுடன் கலத்தல்பருவமடைந்த கோதை, திருவரங்கத்தில் (ஸ்ரீரங்கம்) எழுந்தருளியிருக்கும் ஸ்ரீ ரங்கநாதரையே மணப்பேன் என்று உறுதியாக இருந்தார்.

மகளின் பக்தியைக் கண்ட பெரியாழ்வார், இறைவனின் திருவுள்ளப்படி கோதையை மணக்கோலத்தில் ஸ்ரீரங்கம் அழைத்துச் சென்றார். அங்கு, அரங்கனின் சன்னதிக்குள் சென்ற ஆண்டாள், எல்லாரும் பார்க்கும் வண்ணமே ரங்கநாதரின் திருவடிகளில் ஜோதியாகக் கலந்து பேரின்ப நிலை அடைந்தார்.

ஆண்டாள் நாச்சியாரின் வாழ்க்கை பக்திக்கு வயது வரம்போ, பாலின வேறுபாடோ கிடையாது என்பதை உலகிற்கு உணர்த்துகிறது. தூய்மையான அன்பினாலும் தமிழ்ப் பாசுரங்களினாலும் இறைவனையே அடையலாம் என்பதற்கு ஆண்டாளின் சரித்திரமே சான்று.

இன்றும் ஸ்ரீவில்லிபுத்தூரில் கம்பீரமாக வீற்றிருக்கும் ஆண்டாள் கோவில் கோபுரம், தமிழக அரசின் அதிகாரப்பூர்வ சின்னமாகத் திகழ்வது அவரது பெருமைக்கு மற்றுமொரு சான்றாகும்.

Hindusthan Samachar / vidya.b