ஐதராபாத் , 16 ஆகஸ்ட் (ஹி.ச.)

தெலங்கானா மாநிலத்தில் உணவு மற்றும் மருந்துகளின் தரத்தை கண்காணித்து, கலப்படத்தை தடுக்க அரசு முக்கிய நடவடிக்கை எடுத்துள்ளது.

இதன்படி, தனித்தனியாக செயல்பட்டு வந்த உணவுப் பாதுகாப்புத்துறை மற்றும் மருந்துக் கட்டுப்பாட்டுத்துறையை ஒன்றிணைத்து, ஒருங்கிணைந்த புதிய அமைப்பு உருவாக்கப்பட்டுள்ளது.

இதற்கு ‘டிஜி சேஃப்’

(Telangana Standards Authority for Food and Essential Drugs) என பெயரிடப்பட்டுள்ளது.

இதற்கான அரசாணையை மருத்துவம், சுகாதாரம் மற்றும் குடும்ப நலத்துறை வெளியிட்டுள்ளது. ‘டிஜி சேஃப்’ அமைப்பின் புதிய ஆணையராக ஐ.பி.எஸ். அதிகாரி அவினாஷ் மஹந்தி நியமிக்கப்பட்டுள்ளார்.

இவர் ஏற்கனவே தெலங்கானா மருந்துக் கட்டுப்பாட்டு நிர்வாகத்தின் தலைமை இயக்குனராக பணியாற்றியவர்.

கலப்படத்தை தடுக்க நடவடிக்கை

தெலங்கானாவில் உணவு வணிக நடவடிக்கைகள் தொடர்ந்து அதிகரித்து வரும் நிலையில், தரமற்ற மற்றும் போலியான உணவுப் பொருட்கள், மருந்துகள் புழக்கத்தில் வருவதை தடுத்து பொதுமக்களின் உடல்நலத்தை பாதுகாக்க வேண்டிய அவசியம் ஏற்பட்டுள்ளதாக அரசு தெரிவித்துள்ளது.

உணவுப் பாதுகாப்பு மற்றும் மருந்து கட்டுப்பாடு தொடர்பான சட்டங்களை திறம்பட அமல்படுத்துவதுடன், நுகர்வோர் பாதுகாப்பு மற்றும் தரமான உணவு, மருந்துகள் கிடைப்பதை உறுதி செய்வதும் இந்த ஒருங்கிணைப்பின் முக்கிய நோக்கமாகும்.

ஒரே குடையின் கீழ் பல பிரிவுகள்

‘டிஜி சேஃப்’ அமைப்பின் கீழ் உணவுப் பாதுகாப்பு, மருந்து நிர்வாகம், அமலாக்கம், சட்டம் மற்றும் வழக்குத் தொடர்தல், ஆய்வகங்கள் மற்றும் நிர்வாகம் உள்ளிட்ட பிரிவுகள் செயல்படும்.

அதே நேரத்தில், உணவுப் பாதுகாப்பு மற்றும் மருந்துகள் தொடர்பான சட்டங்களின் கீழ் சம்பந்தப்பட்ட அதிகாரிகளுக்கு வழங்கப்பட்டுள்ள சட்டப்பூர்வ அதிகாரங்கள் தொடர்ந்து நடைமுறையில் இருக்கும் என அரசு தெளிவுபடுத்தியுள்ளது.

கட்டுப்பாட்டு அமைப்பு நவீனமயம்

மாறிவரும் சூழ்நிலைக்கு ஏற்ப உணவு மற்றும் மருந்து கட்டுப்பாட்டு அமைப்புகளை நவீனப்படுத்துவதற்காக மாநில அளவில் ஒரு குழுவும் அமைக்கப்பட உள்ளது.

இந்தக் குழு, தற்போதுள்ள நிர்வாக அமைப்புகள், பணியாளர் விதிமுறைகள், களப்பணிப் பிரிவுகள் மற்றும் ஆய்வகங்களின் உள்கட்டமைப்பு ஆகியவற்றை ஆய்வு செய்யும்.

மேலும், தேசிய மற்றும் சர்வதேச அளவில் சிறப்பாக செயல்படும் நடைமுறைகளை அடிப்படையாக கொண்டு, வலுவான மற்றும் நவீன கட்டுப்பாட்டு அமைப்பை உருவாக்குவதற்கான பரிந்துரைகளை இந்தக் குழு வழங்கும்.

இதன் மூலம் தெலங்கானாவில் கலப்பட உணவுகள், போலி மற்றும் தரமற்ற மருந்துகளுக்கு எதிரான கண்காணிப்பு மற்றும் நடவடிக்கைகள் மேலும் தீவிரப்படுத்தப்படும் என எதிர்பார்க்கப்படுகிறது.

Hindusthan Samachar / M.DEEPAK RAJA