காலே , 16 ஆகஸ்ட் (ஹி.ச.)

இந்தியா-இலங்கை அணிகள் இடையிலான முதல் டெஸ்ட் கிரிக்கெட் போட்டி காலேவில் நடைபெற்று வருகிறது.

இந்த போட்டியில் டாஸ் வென்ற இந்திய அணி முதலில் பேட்டிங்கை தேர்வு செய்தது.

தொடக்க ஆட்டக்காரர் யஷஸ்வி ஜெய்ஸ்வால் 32 ரன்களில் ரன்-அவுட் ஆனார். அவரைத் தொடர்ந்து சிறப்பாக விளையாடிய கே.எல்.ராகுல் 77 ரன்கள் எடுத்தார்.

எனினும், காயம் காரணமாக அவர் ரிட்டையர்ட் ஹர்ட் முறையில் வெளியேறினார். பின்னர் களம் இறங்கிய கேப்டன் சுப்மன் கில் 16 ரன்களில் ஆட்டமிழந்தார்.

இதன்பிறகு தேவ்தத் படிக்கல் நிதானமாக விளையாடி ரன்களை குவித்தார். சிறப்பாக பேட்டிங் செய்த அவர் 134 பந்துகளில் சதம் விளாசினார்.

மறுமுனையில் ரிஷப் பண்ட் அவருக்கு நல்ல ஒத்துழைப்பு அளித்தார். மழை காரணமாக ஆட்டம் அவ்வப்போது தடைபட்ட போதிலும், இந்திய அணி முதல் நாள் ஆட்ட நேர முடிவில் 73 ஓவர்களில் 2 விக்கெட்டுகளை இழந்து 288 ரன்கள் எடுத்திருந்தது.

படிக்கல் 131 ரன்களுடனும், ரிஷப் பண்ட் 27 ரன்களுடனும் ஆட்டமிழக்காமல் இருந்தனர்.இந்த நிலையில், 2-வது நாள் ஆட்டம் தொடங்க இருந்தது.

ஆனால், காலை முதலே காலே பகுதியில் மழை பெய்யத் தொடங்கியது.

லேசான தூறல் தொடர்ந்து பெய்ததால், மைதானம் மற்றும் ஆடுகளம் கவர்களால் மூடப்பட்டன.

மழைநீர் தேங்காமல் இருக்க மைதான ஊழியர்கள் அவ்வப்போது கவர்களில் இருந்த தண்ணீரை அகற்றினர்.

இருப்பினும், தொடர்ந்து மழை பெய்துகொண்டே இருந்ததால் ஆட்டத்தை தொடங்க முடியாத நிலை ஏற்பட்டது.

இதனால் 2-வது நாள் ஆட்டம் தொடங்குவதில் நீண்ட நேரம் தாமதம் ஏற்பட்டது.

தொடர்ந்து மழை பெய்ததால், காலை 11.40 மணியளவில் மதிய உணவு இடைவேளை அறிவிக்கப்பட்டது.

மழை நின்று மைதானம் ஆட்டத்திற்கு தயாரானால் மட்டுமே 2-வது நாள் ஆட்டத்தை தொடங்க முடியும் என்ற நிலை ஏற்பட்டது.

இதனால் ரசிகர்கள் ஆட்டம் எப்போது தொடங்கும் என்ற எதிர்பார்ப்பில் காத்திருந்தனர்.

Hindusthan Samachar / M.DEEPAK RAJA