புதுடெல்லி, 02 ஆகஸ்ட் (ஹி.ச.)

சர்வதேச சந்தையில் கச்சா எண்ணெய் விலை கடந்த சில நாட்களாக சரிவை சந்தித்துள்ளதால், இந்தியாவில் பெட்ரோல் மற்றும் டீசல் விலை குறையுமா என்ற எதிர்பார்ப்பு பொதுமக்கள் மத்தியில் எழுந்துள்ளது.

ஆகஸ்ட் 2-ஆம் தேதி நிலவரப்படி, பிரெண்ட் (Brent) கச்சா எண்ணெய் ஒரு பேரல் 88–89 அமெரிக்க டாலர் அளவிலும், அமெரிக்காவின் WTI கச்சா எண்ணெய் 83–84 டாலர் அளவிலும் வர்த்தகமாகி வருகிறது. உலகளாவிய தேவையில் ஏற்பட்டுள்ள மந்தநிலை மற்றும் OPEC+ நாடுகளின் உற்பத்தி அதிகரிப்பு அறிவிப்புகள் காரணமாக கச்சா எண்ணெய் விலையில் ஓரளவு சரிவு ஏற்பட்டுள்ளது.

இந்தியா தனது கச்சா எண்ணெய் தேவையின் பெரும்பகுதியை இறக்குமதி செய்வதால், சர்வதேச சந்தை விலை மாற்றங்கள் உள்நாட்டு எரிபொருள் விலைகளில் தாக்கத்தை ஏற்படுத்துகின்றன. இதனால், கச்சா எண்ணெய் விலை தொடர்ந்து குறையும் பட்சத்தில், பெட்ரோல் மற்றும் டீசல் சில்லறை விலைகளிலும் குறைப்பு அறிவிக்கப்படலாம் என்ற எதிர்பார்ப்பு வாகன ஓட்டிகள் மற்றும் பொதுமக்கள் மத்தியில் நிலவுகிறது.

இருப்பினும், சர்வதேச கச்சா எண்ணெய் விலை மட்டுமே பெட்ரோல், டீசல் விலையை நிர்ணயிக்காது. ரூபாயின் மதிப்பு, சுத்திகரிப்பு செலவுகள், போக்குவரத்து செலவுகள் மற்றும் மத்திய, மாநில அரசுகளின் வரி உள்ளிட்ட பல்வேறு காரணிகளும் எரிபொருள் விலையை தீர்மானிக்கின்றன.

எனவே, கச்சா எண்ணெய் விலை சரிந்தாலும் உடனடியாக விலை குறைப்பு அறிவிக்கப்படுமா என்பது குறித்து எண்ணெய் நிறுவனங்களின் முடிவே முக்கியமாக இருக்கும் என பொருளாதார நிபுணர்கள் தெரிவித்துள்ளனர்.

Hindusthan Samachar / VINOTH KUMAR P