அமராவதி , 21 ஆகஸ்ட் (ஹி.ச.)

ஆந்திராவில் விரைவில் நடைபெற உள்ள உள்ளாட்சித் தேர்தலுக்கு ஜனசேனா கட்சி தயாராகி வருகிறது. கடந்த பொதுத்தேர்தலில் கூட்டணி வெற்றியை கருத்தில் கொண்டு கடைப்பிடிக்கப்பட்ட 21 தொகுதி போட்டி வியூகத்தை, உள்ளாட்சித் தேர்தலிலும் தொடர வேண்டிய அவசியம் இல்லை என்று கட்சித் தலைவர் மற்றும் துணை முதல்-மந்திரி பவன் கல்யாண் தெரிவித்துள்ளார்.

உள்ளாட்சி அமைப்புகளில் கட்சியின் கள பலத்துக்கு ஏற்ப, தேவையான இடங்களில் வலுவாகப் போட்டியிட வேண்டும் என்றும் அவர் அறிவுறுத்தியுள்ளார்.

இதுதொடர்பாக ஜனசேனா சட்டமன்றக் கட்சி கூட்டம், சட்டசபை வளாகத்தில் உள்ள பவன் கல்யாணின் அலுவலகத்தில் நடைபெற்றது.

இதில் கட்சியின் அமைச்சர்கள், எம்.எல்.ஏ.க்கள் மற்றும் மூத்த நிர்வாகிகள் கலந்து கொண்டனர். கூட்டத்தில் உள்ளாட்சித் தேர்தலுக்கான கட்சியின் அடுத்தகட்ட நடவடிக்கைகள் குறித்து விரிவாக ஆலோசிக்கப்பட்டது.

கடந்த பொதுத்தேர்தலில் அப்போதைய ஆட்சியை முடிவுக்கு கொண்டு வந்து, மாநிலத்தின் எதிர்காலத்தை பாதுகாக்க வேண்டும் என்ற நோக்கத்தில் ஜனசேனா 21 சட்டமன்றத் தொகுதிகளில் மட்டுமே போட்டியிட்டதாக பவன் கல்யாண் குறிப்பிட்டார். அந்த வியூகம் பொதுத்தேர்தலுக்கானது மட்டுமே என்றும், உள்ளாட்சித் தேர்தலில் ஒவ்வொரு பகுதியின் அரசியல் மற்றும் சமூக நிலவரத்தைப் பொறுத்து தனித்தனி வியூகம் வகுக்கப்படும் என்றும் அவர் தெரிவித்தார்.

மேலும், எம்.எல்.ஏ.க்கள் தங்கள் தொகுதிகளுக்கு மட்டும் முக்கியத்துவம் அளிக்காமல், தங்களுக்கு தொடர்புடைய பிற பகுதிகளிலும் ஜனசேனாவின் பலம், கட்சி அமைப்பு மற்றும் வெற்றி வாய்ப்புகளை மதிப்பீடு செய்ய வேண்டும் என்று அவர் கேட்டுக்கொண்டார்.

போட்டியிடுவதற்கு சாதகமான இடங்களை அடையாளம் கண்டு, அது தொடர்பான அறிக்கையை கட்சித் தலைமை அலுவலகத்துக்கு வழங்கவும் அவர் உத்தரவிட்டார்.

உள்ளாட்சித் தேர்தலுக்கான செயல்திட்டம் மற்றும் விதிமுறைகளை வகுப்பதற்காக 9 முதல் 11 பேர் கொண்ட சிறப்புக் குழு அமைக்கப்படும் என்றும் பவன் கல்யாண் தெரிவித்தார். இந்தக் குழு களத்தில் உள்ள கட்சி நிர்வாகிகள் மற்றும் தொண்டர்களின் கருத்துகளை கேட்டறிந்து, தேர்தலுக்கான விரிவான வியூகத்தை உருவாக்கும் என்றும் அவர் கூறினார்.

கடந்த ஆட்சிக் காலத்தில் நடைபெற்ற உள்ளாட்சித் தேர்தலின்போது பல்வேறு தாக்குதல்கள், மிரட்டல்கள் மற்றும் அரசியல் அழுத்தங்களை எதிர்கொண்ட நிலையிலும் ஜனசேனா தொண்டர்கள் துணிச்சலுடன் களத்தில் நின்றதை பவன் கல்யாண் நினைவுகூர்ந்தார்.

வேட்புமனு தாக்கல் செய்ய முடியாத சூழ்நிலைகள் உருவாக்கப்பட்ட போதிலும் அப்போதைய ஆட்சியாளர்களை எதிர்த்து போட்டியிட்ட தொண்டர்களின் போராட்ட உணர்வையும் தியாகத்தையும் கட்சி ஒருபோதும் மறக்காது என்று அவர் கூறினார்.

இந்த நிலையில், சில தொகுதிகளில் கூட்டணி கட்சிகளைச் சேர்ந்த நிர்வாகிகள் கூட்டணி தர்மத்தை பின்பற்றாமல் செயல்படுவதாகவும், இதனால் ஜனசேனா தொண்டர்களிடையே அதிருப்தி ஏற்பட்டுள்ளதாகவும் கூட்டத்தில் சில எம்.எல்.ஏ.க்கள் பவன் கல்யாணின் கவனத்துக்கு கொண்டு சென்றனர்.

இதற்கு பதிலளித்த அவர், இந்த விவகாரங்கள் தனது கவனத்திலும் இருப்பதாக தெரிவித்தார். கட்சி தொண்டர்களின் மனநிலையை மதித்து, அவர்களுக்கு அரசியல் ரீதியாக உரிய ஆதரவும் வாய்ப்புகளும் வழங்கப்படும் என்றும் உறுதியளித்தார்.

உள்ளாட்சித் தேர்தலை கட்சியின் அடித்தளத்தை மேலும் வலுப்படுத்துவதற்கான முக்கிய வாய்ப்பாக கருதும் ஜனசேனா, கள நிலவரத்தை ஆய்வு செய்து வேட்பாளர்களை தேர்வு செய்து, வலுவான போட்டியை எதிர்கொள்ள தயாராகி வருவது குறிப்பிடத்தக்கது.

Hindusthan Samachar / M.DEEPAK RAJA