சென்னை, 23 ஆகஸ்ட் (ஹி.ச.)

தேசிய விண்வெளி தினத்தை முன்னிட்டு அனைவருக்கும் பா.ஜ.க. மாநிலத் தலைவர் நயினார் நாகேந்திரன் வாழ்த்து தெரிவித்துள்ளார்.

இதுகுறித்து அவர் வெளியிட்டுள்ள வாழ்த்துச் செய்தியில்,

விண்மீன்களை வெறுமனே ரசித்த தலைமுறையிலிருந்து, விண்வெளியை நேரடியாக ஆராய்ந்து உலகையே வியக்க வைக்கும் தலைமுறையாக இந்தியா உயர்ந்து நிற்பதாக பெருமிதம் தெரிவித்துள்ளார்.

இந்தியாவின் விண்வெளிப் பயணத்தில் நாட்டின் விஞ்ஞானிகளின் அர்ப்பணிப்பும், அவர்களின் கடின உழைப்பும், அறிவியல் மீதான ஆர்வமும் முக்கிய பங்காற்றி வருவதாக அவர் குறிப்பிட்டுள்ளார். தொடர்ந்து மேற்கொள்ளப்பட்டு வரும் புதிய விண்வெளி ஆய்வுகள், இந்தியாவின் அறிவியல் மற்றும் தொழில்நுட்ப திறனை உலக அரங்கில் மேலும் உயர்த்தி வருவதாகவும் தெரிவித்துள்ளார்.

குறிப்பாக, நிலவை ஆய்வு செய்ய மேற்கொள்ளப்பட்ட சந்திரயான் திட்டங்கள் இந்தியாவின் விண்வெளி ஆராய்ச்சியில் முக்கியமான மைல்கற்களாக அமைந்துள்ளன என்றும், அதனைத் தொடர்ந்து சூரியனை ஆய்வு செய்வதற்காக மேற்கொள்ளப்பட்ட ஆதித்யா-L1 திட்டம் இந்தியாவின் விண்வெளி ஆராய்ச்சியின் அடுத்தகட்ட முன்னேற்றத்தை வெளிப்படுத்துவதாகவும் நயினார் நாகேந்திரன் தெரிவித்துள்ளார்.

இந்திய விஞ்ஞானிகளின் ஒவ்வொரு சாதனையும் நாட்டின் அறிவியல் ஆற்றலையும், இந்தியர்களின் கனவுகளின் உயரத்தையும் உலகிற்கு எடுத்துக்காட்டுவதாக அவர் கூறியுள்ளார்.

விண்வெளித் துறையில் இந்தியா தொடர்ந்து புதிய இலக்குகளை நோக்கி முன்னேறி வருவதற்கு விஞ்ஞானிகளின் அர்ப்பணிப்பு முக்கிய காரணமாக இருப்பதாகவும் அவர் பாராட்டியுள்ளார்.

விண்வெளி ஆராய்ச்சி மற்றும் அறிவியல் முன்னேற்றத்தில் இந்தியா மேலும் பல உயரங்களை எட்ட வேண்டும் என்றும், நாட்டின் இளம் தலைமுறையினர் அறிவியல் மற்றும் தொழில்நுட்பத் துறைகளில் அதிக ஆர்வத்துடன் பங்களிக்க வேண்டும் என்றும் அவர் வாழ்த்து தெரிவித்துள்ளார்.

அனைவருக்கும் தேசிய விண்வெளி தின நல்வாழ்த்துகள்.

இந்தியாவின் விண்வெளிப் பயணம் மேலும் பல புதிய உச்சங்களைத் தொடட்டும் என நயினார் நாகேந்திரன் தெரிவித்துள்ளார்.

Hindusthan Samachar / P YUVARAJ