சென்னை, 24 ஆகஸ்ட் (ஹி.ச.)

தமிழ் திரையுலகில் தனக்கென தனி முத்திரை பதித்து, நான்கு தலைமுறை ரசிகர்களின் நெஞ்சங்களில் நீங்கா இடம்பிடித்த மூத்த நடிகை சௌகார் ஜானகியின் மறைவுக்கு தமிழக சட்டப்பேரவையில் இன்று இரங்கல் தீர்மானம் வாசிக்கப்பட்டது.

சட்டப்பேரவை கூட்டத்தொடரின் போது, சபாநாயகர் ஜே.சி.டி. பிரபாகர் இந்த இரங்கல் தீர்மானத்தை வாசித்தார்.

அப்போது பேசிய அவர், சௌகார் ஜானகி திரைத்துறையில் ஒரு சகாப்தம் என்றும், இனிய திரையுலகில் தனது அழுத்தமான நடிப்பாலும், கண்ணியமான தோற்றத்தாலும் தனக்கென ஒரு தனி அடையாளத்தை உருவாக்கிக் கொண்டவர் என்றும் புகழாரம் சூட்டினார்.

நான்கு தலைமுறை ஆளுமைகளுடன் இணைந்து நடித்த பெருமைக்குரியவரான சௌகார் ஜானகி, தமிழ், தெலுங்கு, கன்னடம், மலையாளம், இந்தி என பல்வேறு மொழிகளில் 400-க்கும் மேற்பட்ட திரைப்படங்களில் நடித்து பன்முகத் திறமை கொண்ட கலைஞராக விளங்கினார் என்று சபாநாயகர் குறிப்பிட்டார்.

தாயாக, அண்ணியாக, மனைவியாக என அவர் ஏற்று நடித்த ஒவ்வொரு கதாபாத்திரமும் தமிழ் சினிமாவின் வரலாற்றில் அழியாத முத்திரைகள் என்றும் அவர் தெரிவித்தார்.

அவரது மறைவு திரையுலகிற்கு மட்டுமல்லாமல், ஒட்டுமொத்த கலைத்துறைக்கே பேரிழப்பாகும் என்று கூறி அவையினர் அனைவரும் எழுந்து நின்று இரண்டு நிமிடம் மௌன அஞ்சலி செலுத்தினர்.

Hindusthan Samachar / vidya.b