சென்னை, 26 ஆகஸ்ட் (ஹி.ச.)

இறைத்தூதர் நபிகள் நாயகம் அவர்களின் பிறந்த தினமான மிலாடி நபி திருநாளை முன்னிட்டு, இன்று தமிழகம் மற்றும் உலகெங்கும் வாழும் இஸ்லாமிய பெருமக்கள் அனைவருக்கும் மதிமுக பொதுச்செயலாளர் வைகோ தனது இதயம் கனிந்த நல்வாழ்த்துக்களை தெரிவித்துள்ளார்.

இதுகுறித்து அவர் வெளியிட்டுள்ள வாழ்த்து செய்தியில்,

அண்ணல் நபிகள் நாயகம் அவர்கள் வெறும் ஒரு மதத்தின் தலைவர் மட்டுமல்ல, ஒட்டுமொத்த மனித குலத்தின் விடுதலைக்காகவும், மூட நம்பிக்கைகளும் அறியாமையும் அழிந்து, அறிவும், அன்பும், சமத்துவமும் தழைத்தோங்க வேண்டும் என்பதற்காக தனது வாழ்நாள் முழுவதும் அயராது பாடுபட்ட மாபெரும் புரட்சியாளர் என்று புகழாரம் சூட்டியுள்ளார்.

அரேபிய மண்ணில் அறியாமை இருள் சூழ்ந்திருந்த காலத்தில், ஏழை எளிய மக்களின் துயர் துடைத்து, பெண்களுக்கு உரிமை வழங்கி, அடிமைத்தனத்தை ஒழித்து, சகோதரத்துவத்தையும், மனிதநேயத்தையும் போதித்தவர் பெருமானார். அவர் காட்டிய பாதை இன்றும் உலகிற்கு தேவையான ஒளிவிளக்காக திகழ்கிறது. பொறுமை, தியாகம், கருணை, நேர்மை ஆகிய உயரிய பண்புகளை தனது வாழ்க்கை மூலமே வாழ்ந்து காட்டியவர்.

இன்றைய சூழலில் மத நல்லிணக்கமும், சமூக ஒற்றுமையும் மிகவும் அவசியமானதாக உள்ளது. நபிகள் நாயகத்தின் போதனைகளான அன்பு, அமைதி, சகிப்புத்தன்மை ஆகியவற்றை அனைவரும் கடைபிடித்து, ஜாதி, மத பேதமின்றி ஒற்றுமையுடன் வாழ வேண்டும்.

அவர் வழியில் நடந்து, ஏழை எளியோருக்கு உதவி, சமூக நீதியை நிலைநாட்ட உறுதி ஏற்போம் என்றும் வைகோ தனது செய்தியில் குறிப்பிட்டுள்ளார்.

மிலாது நபி திருநாள் அனைவரது வாழ்விலும் மகிழ்ச்சியையும், அமைதியையும், வளத்தையும் கொண்டு வரட்டும் என்றும் அவர் வாழ்த்தியுள்ளார்.

Hindusthan Samachar / vidya.b