புதுடெல்லி, 29 ஆகஸ்ட் (ஹி.ச.)

இந்தியாவின் மிகவும் புகழ்பெற்ற ஹாக்கி வீரர்களில் ஒருவரான மேஜர் தயான் சந்தின் பிறந்தநாளைக் குறிக்கும் வகையில் ஒவ்வொரு ஆண்டும் ஆகஸ்ட் 29-ம் தேதி தேசிய விளையாட்டு தினம் கொண்டாடப்படுகிறது.

விளையாட்டு மற்றும் உடல் செயல்பாடுகளின் முக்கியத்துவத்தை எடுத்துக்காட்டும் இந்த நாள், உடற்தகுதி, ஒழுக்கம், குழு மனப்பான்மை மற்றும் விளையாட்டுத் திறனை ஊக்குவிக்கிறது.

சுறுசுறுப்பான மற்றும் ஆரோக்கியமான வாழ்க்கை முறையை பின்பற்ற ஊக்குவிப்பதால், இந்த நாள் மாணவர்கள், குடும்பங்கள், பள்ளிகள் மற்றும் சமூகங்களுக்கு முக்கியத்துவம் வாய்ந்ததாக கருதப்படுகிறது.

மேலும் இது இந்தியாவின் வளமான விளையாட்டு பாரம்பரியத்தை நினைவுகூரவும், வீரர்கள், பயிற்சியாளர்கள் மற்றும் விளையாட்டு சமூகத்தைச் சேர்ந்த பிற உறுப்பினர்களின் பங்களிப்பை அங்கீகரிக்கவும் ஒரு வாய்ப்பாக அமைகிறது.

இந்தியா தேசிய விளையாட்டு தினத்தை கொண்டாடும் வேளையில், வாரந்தோறும் குறைந்தது ஒரு மணி நேரத்தையாவது விளையாட்டு மற்றும் உடற்பயிற்சிக்காக ஒதுக்க வேண்டும் என்று மத்திய விளையாட்டுத்துறை அமைச்சர் மன்சுக் மாண்டவியா பொதுமக்களுக்கு, குறிப்பாக இளைஞர்களுக்கு வேண்டுகோள் விடுத்துள்ளார்.

இது தொடர்பாக இன்று செய்தியாளர்களிடம் பேசிய அமைச்சர் மாண்டவியா,

இன்று மேஜர் தயான் சந்தின் 119-வது பிறந்தநாள். மேஜர் தயான் சந்தின் பிறந்தநாளை நாம் தேசிய விளையாட்டு தினமாக கொண்டாடுகிறோம். இன்று தேசிய விளையாட்டு தினத்தை முன்னிட்டு, பிட் இந்தியா இயக்கத்தை நாடு முழுவதும் முன்னெடுத்துச் செல்ல, விளையாட்டு மைதானத்தில் ஒரு மணி நேரம் செலவிடும் திட்டம் தொடங்கப்பட்டுள்ளது.

இன்று காலை முதலே, லட்சக்கணக்கான இளைஞர்கள் ஒவ்வொரு தெருவிலும், மைதானத்திலும் ஒன்றுகூடி ஒரு மணி நேரம் விளையாடி வருவதாக தகவல்கள் வந்து கொண்டிருக்கின்றன.

பிரதமர் மோடியின் தலைமையில் நாடு வளர்ச்சியடைந்து முன்னேறி வருவது மகிழ்ச்சி அளிக்கிறது. புதிய இந்தியா உருவாக்கப்பட்டு வருகிறது.

இந்த புதிய இந்தியாவை உருவாக்குவதில், நமது இளைஞர்கள் உடற்தகுதியுடனும், நமது சமூகம் ஆரோக்கியத்துடனும் இருந்தால் மட்டுமே நாம் வளமான தேசமாக மாற முடியும்.

வளமான தேசம் என்ற பிரதமர் மோடியின் தொலைநோக்கு பார்வையை நிறைவேற்ற, நாம் அனைவரும் வாரந்தோறும் விளையாட்டு மைதானத்தில் ஒரு மணி நேரம் செலவிட உறுதி எடுத்து, நம்மை உடற்தகுதியுடன் வைத்துக் கொள்வோம்.

என்று அவர் தெரிவித்தார்.

Hindusthan Samachar / vidya.b