புதுடெல்லி, 30 ஆகஸ்ட் (ஹி.ச)

ஃபிட் இந்தியா சண்டேஸ் ஆன் சைக்கிள் முயற்சி மத்திய விளையாட்டுத்துறை அமைச்சர் மன்சுக் மாண்டவியாவால் 2024 டிசம்பரில் தொடங்கப்பட்டது. இது இந்திய விளையாட்டு ஆணையம், இளைஞர் விவகாரங்கள் மற்றும் விளையாட்டு அமைச்சகம், இந்திய சைக்கிள் கூட்டமைப்பு, இந்தியன் ரோப் ஸ்கிப்பிங் கூட்டமைப்பு, யோகாசன பாரத், ராஹ்கிரி அறக்கட்டளை, மை பைக்ஸ் மற்றும் மை பாரத் ஆகியவற்றின் ஒத்துழைப்புடன் ஏற்பாடு செய்யப்பட்டுள்ளது.

இந்த சைக்கிள் பேரணி அனைத்து மாநிலங்கள் மற்றும் யூனியன் பிரதேசங்களில் ஒரே நேரத்தில் நடத்தப்படுகிறது. இதில் இந்திய விளையாட்டு ஆணையத்தின் மண்டல மையங்கள், தேசிய சிறப்பு மையங்கள், பயிற்சி மையங்கள், கேலோ இந்தியா மாநில சிறப்பு மையங்கள் மற்றும் கேலோ இந்தியா மையங்கள் அடங்கும்.

அந்த வகையில் மத்திய விளையாட்டுத்துறை அமைச்சர் மன்சுக் மாண்டவியா மற்றும் இந்திய ஆண்கள் கிரிக்கெட் அணியின் தலைமைப் பயிற்சியாளர் கௌதம் கம்பீர் ஆகியோர் இன்று நடைபெற்ற 'சண்டேஸ் ஆன் சைக்கிள்' நிகழ்ச்சியில் பங்கேற்று, உடற்தகுதிக்கு முக்கியத்துவம் அளிக்க வேண்டும் என்றும், இதனை தேசிய அளவிலான இயக்கமாக மாற்ற வேண்டும் என்றும் வலியுறுத்தினர்.

செய்தியாளர்களிடம் பேசிய கம்பீர் கூறியதாவது,

இந்தியா எந்த அளவுக்கு உடற்தகுதியுடன் இருக்கிறதோ, அந்த அளவுக்கு வலிமையானதாகவும், தன்னிறைவு பெற்றதாகவும் இருக்கும். இதனை ஒரு நிகழ்ச்சியாக மட்டும் பார்க்காமல், ஒரு இயக்கமாக பார்க்க வேண்டும்.

இளைஞர்களும் இந்த முயற்சியில் ஈடுபட்டுள்ள அனைவரும் இணைந்து, மக்கள் தங்கள் உடற்தகுதியை பேணுவதற்கு உதவும் வகையில் இதனை ஒரு நிலையான இயக்கமாக மாற்ற பங்களிக்க வேண்டும்.

என்று கம்பீர் அழைப்பு விடுத்தார்.

'சண்டேஸ் ஆன் சைக்கிள்' நிகழ்ச்சி குறித்து அமைச்சர் மாண்டவியா கூறுகையில்,

நாட்டில் சைக்கிள் மோகம் அதிகரித்து வருகிறது. ஞாயிற்றுக்கிழமை சைக்கிள் ஓட்டுதல் மெதுவாக மக்களிடையே ஒரு ஆர்வமாக மாறி வருகிறது. சைக்கிள் ஓட்டுதல் சிறந்த உடற்பயிற்சி. சைக்கிள் ஓட்டுதல் மாசுபாட்டிற்கான தீர்வு. சைக்கிள் ஓட்டுதல் தான் உடற்தகுதியுடன் இருப்பதற்கான மந்திரம். சைக்கிள் ஓட்டுதல் போக்குவரத்து நெரிசலுக்கும் தீர்வாகும்.

நமது இளம் நண்பர்கள் அனைவரும் தினமும் ஒரு மணி நேரம் மொபைல் அல்லது கணினித் திரையில் இருந்து விலகி விளையாட்டு மைதானத்திற்குச் செல்லட்டும். சைக்கிள் ஓட்டுங்கள், விளையாடுங்கள், உங்களை உடற்தகுதியுடன் வைத்துக் கொள்ளுங்கள்.

இயல்பாகவே, ஒரு விளையாட்டு பிரபலம் வரும்போது, மக்கள் அவரைப் பார்த்து உத்வேகம் பெறுகிறார்கள். அந்த உத்வேகத்தைக் கொண்டு நம்மை நாமே உடற்தகுதியுடன் வைத்துக் கொண்டால் கூட போதும்

என்று அவர் கூறினார்.

இந்த நிகழ்ச்சியில் பங்கேற்ற பாலிவுட் நடிகரும் கலப்பு தற்காப்பு கலை வீரருமான சங்க்ராம் சிங் கூறுகையில்,

உண்மையைச் சொன்னால், நான் அமைச்சரைப் பார்க்கும் போதும், அவரது வாழ்க்கை முறையை கவனிக்கும் போதும், அது உண்மையிலேயே ஊக்கமளிக்கிறது. சைக்கிள் ஓட்டுதலை உங்கள் வாழ்க்கையில் ஒரு பழக்கமாக மாற்றிக் கொண்டால், நீங்கள் மிகவும் ஆரோக்கியமாகவும் உடற்தகுதியுடனும் இருப்பீர்கள்.

நான் தனிப்பட்ட முறையில் உள்ளூர் சைக்கிளையே விரும்புகிறேன். ஏனென்றால், உடற்தகுதியான இந்தியாதான் சிறந்த இந்தியா.

என்று அவர் கூறினார்.

Hindusthan Samachar / vidya.b