மும்பை, 31 ஆகஸ்ட் (ஹி.ச)

இந்திய கடற்படையின் இரண்டாவது டைவிங் ஆதரவு கப்பலான 'நிபுண்' இன்று மும்பை கடற்படை தளத்தில் பணியில் இணைக்கப்பட்டது. இந்த நிகழ்ச்சிக்கு கடற்படைத் தளபதி அட்மிரல் கிருஷ்ணா சுவாமிநாதன் தலைமை தாங்கினார்.

இந்துஸ்தான் ஷிப்யார்ட் லிமிடெட் நிறுவனத்தால் கட்டப்பட்ட இந்தக் கப்பல், கடந்த ஜூலை 30, 2026 அன்று விசாகப்பட்டினத்தில் இந்திய கடற்படையிடம் ஒப்படைக்கப்பட்டது. இந்தியன் ரெஜிஸ்டர் ஆஃப் ஷிப்பிங்கின் வகைப்பாட்டு விதிகளின்படி இது வடிவமைக்கப்பட்டு கட்டப்பட்டுள்ளது. இந்தக் கப்பலின் வருகை ஆழ்கடல் மூழ்குதல் மற்றும் நீருக்கடியில் செயல்படும் திறன்களை மேம்படுத்தும்.

சமஸ்கிருதத்தில் இருந்து பெறப்பட்ட 'நிபுண்' என்ற பெயருக்கு ஒரு குறிப்பிட்ட துறையில் திறமையானவர், திறன் வாய்ந்தவர் மற்றும் நன்கு தேர்ந்தவர் என்று பொருள். இது கப்பலின் சிறப்பு பங்கை பிரதிபலிக்கிறது. அதிநவீன மூழ்கு உபகரணங்களுடன் கூடிய இந்தக் கப்பல், ஆழ்கடல் செறிவூட்டல் மூழ்குதல் திறன் கொண்டது. செயல்பாடுகளை எளிதாக்குவதற்காக பக்கவாட்டு மூழ்கு மேடையும் இதில் உள்ளது.

கப்பலில் உள்ள தொலைவிலிருந்து இயக்கப்படும் வாகனங்கள், மூழ்குபவர்களை கண்காணிக்கவும் மீட்பு நடவடிக்கைகளை மேற்கொள்ளவும் உதவுவதன் மூலம் செயல்பாட்டு திறன்களை மேம்படுத்துகின்றன. மேலும், அவசர காலங்களில் நீர்மூழ்கிக் கப்பல்களில் இருந்து பணியாளர்களை வெளியேற்ற உதவும் ஆழ்கடல் மீட்பு கப்பலுக்கு தாய்க்கப்பலாகவும் 'நிபுண்' செயல்படும்.

கிட்டத்தட்ட 75 சதவீத உள்நாட்டு தயாரிப்புகளைக் கொண்ட 'நிபுண்', உள்நாட்டு கப்பல் கட்டுமானத்தில் இந்திய கடற்படையின் முயற்சிக்கு கிடைத்த முக்கிய வெற்றியாகும். இது தற்சார்பு பாரதம் என்ற அரசின் தொலைநோக்கு பார்வைக்கு ஏற்ப அமைந்துள்ளது.

இந்தக் கப்பல் பல்வேறு மூழ்குதல் மற்றும் நீருக்கடியிலான செயல்பாடுகளை ஆதரிக்கும் வகையில் வடிவமைக்கப்பட்டுள்ளது. கடினமான கடல் சூழ்நிலைகளில் தொடர்ச்சியான ஆதரவை வழங்கவும், நீர்மூழ்கி மீட்பு நடவடிக்கைகளை மேம்படுத்தவும் நவீன மூழ்கு அமைப்புகள் மற்றும் நீருக்கடியில் தலையீட்டு திறன்களைக் கொண்டுள்ளது.

Hindusthan Samachar / vidya.b