சென்னை, 04 ஆகஸ்ட் (ஹி.ச.)

காவிரி நீர் விவகாரம் போன்ற தமிழ்நாட்டின் முக்கிய பிரச்சினைகளில்தான் அரசியல் கட்சிகள் கவனம் செலுத்த வேண்டும் என்றும், பெண்களை இழிவுபடுத்துபவர்கள் இந்த மண்ணை ஆளத் தகுதியற்றவர்கள் என்றும் நடிகையும் அதிமுக பிரமுகருமான காயத்ரி ரகுராம் தெரிவித்துள்ளார்.

இதுகுறித்து அவர் தனது எக்ஸ் சமூக வலைதளப் பதிவில்,

காவிரி விவகாரத்தை விட்டு திரிஷா தொடர்பான விவகாரத்தை முன்னிறுத்துவது அரசியல் தந்திரமாக மாறிவிட்டதாக விமர்சித்துள்ளார். தற்போது உதயநிதி ஸ்டாலினுக்கு எதிராக டிவிகே போராடி வருவதாகக் குறிப்பிட்ட அவர்,

அதற்குப் பதிலாக தமிழ்நாட்டின் உரிமை சார்ந்த காவிரி நீர் பிரச்சினையில் கர்நாடக அரசுக்கு எதிராகக் குரல் கொடுத்து போராடுவதிலேயே கவனம் செலுத்த வேண்டும் என்று வலியுறுத்தியுள்ளார்.

மேலும், திமுகவின் அரசியல் நடைமுறையில் பல நேரங்களில் பெண்கள் இழிவுபடுத்தப்படுவதாகக் குற்றம்சாட்டிய அவர், இதுபோன்ற செயல்களை பெண்கள் பெரிதாக எடுத்துக்கொள்ளாமல் புறக்கணிக்கக் கற்றுக்கொண்டுள்ளதாகவும் தெரிவித்துள்ளார்.

தமிழ்நாட்டின் நலனுக்காக டிவிகே உண்மையான மக்கள் பிரச்சினைகளை மையமாகக் கொண்டு அரசியல் நடத்த வேண்டும் என்றும், பெண்களை இழிவுபடுத்துபவர்கள், பெண்களை அவமதிப்பவர்கள் மற்றும் பெண்களுக்கு துரோகம் செய்பவர்கள் இந்த மண்ணை ஆளத் தகுதியற்றவர்கள் என்றும் காயத்ரி ரகுராம் தனது பதிவில் தெரிவித்துள்ளார்.

மேலும், இந்த மண்ணின் மீது உண்மையான பற்றும் மரியாதையும் கொண்டவர், தனது வாழ்க்கையில் உள்ள பெண்களிடமும் அதே மரியாதையையும் நேர்மையையும் கடைப்பிடிப்பார் என்றும் அவர் தனது பதிவில் குறிப்பிட்டுள்ளார்.

Hindusthan Samachar / P YUVARAJ