சேலம், 01 செப்டம்பர் (ஹி.ச.)

காவிரி டெல்டா மாவட்டங்களின் பாசனத் தேவைக்காக மேட்டூர் ஸ்டான்லி அணையிலிருந்து தண்ணீர் திறந்துவிடும் நிகழ்வு இன்று நடைபெற்றது.

தமிழக முதலமைச்சர் விஜய் நேரில் கலந்து கொண்டு அணையின் மதகுகளை திறந்து வைத்து பாசனத்திற்காக தண்ணீரை வெளியேற்றினார்.

சேலம் மாவட்டம் மேட்டூரில் அமைந்துள்ள ஸ்டான்லி அணை, காவிரி டெல்டா மாவட்டங்களின் விவசாயத்திற்கு முக்கிய நீராதாரமாக விளங்கி வருகிறது.

பொதுவாக ஆண்டுதோறும் ஜூன் 12-ஆம் தேதி குறுவை சாகுபடிக்காக அணையிலிருந்து தண்ணீர் திறந்துவிடப்படுவது வழக்கம். ஆனால், இந்த ஆண்டு காவிரி நீர்ப்பிடிப்பு பகுதிகளில் போதிய மழை இல்லாததும், கர்நாடகாவில் இருந்து எதிர்பார்த்த அளவுக்கு நீர் கிடைக்காததும் காரணமாக வழக்கமான தேதியில் அணையை திறக்க முடியாத நிலை ஏற்பட்டது.

இதனால் டெல்டா மாவட்ட விவசாயிகள் பாசன நீரை எதிர்நோக்கி காத்திருந்தனர்.

அணையின் நீர்மட்டம் உயர்ந்ததைத் தொடர்ந்து, டெல்டா பகுதிகளின் பாசனத் தேவையை கருத்தில் கொண்டு செப்டம்பர் 1-ஆம் தேதி முதல் தண்ணீர் திறந்துவிட தமிழக அரசு முடிவு செய்தது.

முதல்கட்டமாக 45 நாட்களுக்கு தண்ணீர் திறக்கப்படும் என அரசு தரப்பில் தெரிவிக்கப்பட்டிருந்தது.

இதன்படி இன்று மேட்டூர் வந்த முதலமைச்சர் விஜய், அணையின் வலது கரை கால்வாய் மற்றும் பாசனத்திற்கான நீர் திறப்பு நிகழ்வில் கலந்து கொண்டார்.

அணையின் மதகுகளை திறந்து வைத்து டெல்டா பாசனத்திற்காக காவிரி ஆற்றில் தண்ணீரை வெளியேற்றினார்.

முதலமைச்சர் விஜய் திறந்து வைத்ததன் மூலம் நீர் காவிரி ஆற்றின் வழியாக டெல்டா மாவட்டங்களை நோக்கி செல்லத் தொடங்கியுள்ளது.

மேட்டூர் அணையிலிருந்து திறக்கப்படும் தண்ணீர் மூலம் தஞ்சாவூர், திருவாரூர், நாகப்பட்டினம், மயிலாடுதுறை உள்ளிட்ட காவிரி டெல்டா பகுதிகளில் விவசாயப் பணிகள் நடைபெறுவதற்கு உதவியாக இருக்கும் என எதிர்பார்க்கப்படுகிறது. குறிப்பாக பாசன நீரை எதிர்பார்த்து காத்திருந்த விவசாயிகளுக்கு அணை திறப்பு முக்கிய நம்பிக்கையை ஏற்படுத்தியுள்ளது.

அதேநேரத்தில், அணையில் உள்ள நீர் இருப்பு, வரத்து மற்றும் எதிர்வரும் மழை நிலவரத்தை கருத்தில் கொண்டு தண்ணீரை சிக்கனமாக பயன்படுத்தி, திட்டமிட்டு சாகுபடி மேற்கொள்ள வேண்டும் என விவசாயிகளுக்கு அறிவுறுத்தப்பட்டுள்ளது.

காவிரி நீர் பங்கீடு தொடர்பான பிரச்சினைகளுக்கு மத்தியிலும், டெல்டா விவசாயிகளின் தேவையை கருத்தில் கொண்டு மேட்டூர் அணை திறக்கப்பட்டிருப்பது முக்கியத்துவம் வாய்ந்த நிகழ்வாக பார்க்கப்படுகிறது.

Hindusthan Samachar / GOKILA arumugam