புதுடெல்லி, 11 செப்டம்பர் (ஹி.ச.)

ஈரான் அதிபர் மசூத் பெசஸ்கியான் இன்று மாலை சுமார் 6 மணியளவில் பிரதமர் நரேந்திர மோடியை டெல்லியில் சந்தித்து பேச உள்ளார்.

பிரிக்ஸ் உச்சி மாநாட்டில் பங்கேற்பதற்காக 8 ஆண்டுகளுக்குப் பிறகு இந்தியா வரும் முதல் ஈரான் அதிபர் இவர் என்பது குறிப்பிடத்தக்கது. கடைசியாக 2018-ம் ஆண்டு ஹசன் ரூஹானி இந்தியாவிற்கு வருகை தந்திருந்தார். நாளை பாரத் மண்டபத்தில் தொடங்கும் பிரிக்ஸ் உச்சி மாநாட்டிற்கு முன்னதாக இந்த இருதரப்பு சந்திப்பு நடைபெறுகிறது.

இந்த சந்திப்பில் மத்திய கிழக்கில் நிலவி வரும் பதற்றமான சூழல் மற்றும் அமைதியை நிலைநாட்டுவது குறித்து இரு தலைவர்களும் விரிவாக விவாதிக்க உள்ளதாக தகவல்கள் தெரிவிக்கின்றன. குறிப்பாக ஹார்முஸ் ஜலசந்தியில் சுதந்திரமான கப்பல் போக்குவரத்தை உறுதி செய்தல், சர்வதேச எரிசக்தி பாதுகாப்பு மற்றும் சபஹார் துறைமுகம் வழியிலான வர்த்தக ஒத்துழைப்பை விரிவுபடுத்துவது குறித்தும் ஆலோசிக்கப்படும் என எதிர்பார்க்கப்படுகிறது.

மத்திய கிழக்கில் போர் மேகங்கள் சூழ்ந்துள்ள நிலையில், அனைத்து பிரச்சினைகளுக்கும் பேச்சுவார்த்தை மற்றும் ராஜதந்திர வழியிலேயே தீர்வு காண வேண்டும் என்பதே இந்தியாவின் நிலைப்பாடு என பிரதமர் மோடி ஏற்கனவே வலியுறுத்தியுள்ளார்.

இந்த பின்னணியில் நடைபெறும் இன்றைய சந்திப்பு இந்தியா-ஈரான் உறவில் மட்டுமின்றி, பிராந்திய அமைதிக்கும் முக்கியத்துவம் வாய்ந்ததாக கருதப்படுகிறது.

Hindusthan Samachar / vidya.b