ஜம்மு, 12 செப்டம்பர் (ஹி.ச)

ஜம்மு காஷ்மீரில் போதைப்பொருள் நடமாட்டம் அதிகமுள்ள பகுதியாக அடையாளம் காணப்பட்டுள்ள வாகமாவில், அனந்த்நாக் போலீசார் இன்று பெரிய அளவிலான போதைப்பொருள் தடுப்பு சுற்றிவளைப்பு மற்றும் தேடுதல் வேட்டையை நடத்தினர்.

வாகமா பகுதியில் உள்ள 20 இடங்களில் ஒரே நேரத்தில் நடத்தப்பட்ட இந்த ஒருங்கிணைந்த சோதனையின் போது, போதைப்பொருள் விற்பனையில் ஈடுபட்டதாக சந்தேகிக்கப்படும் 13 நபர்கள் விசாரணைக்காக கைது செய்யப்பட்டனர்.

உள்ளூர் சட்டவிரோத போதைப்பொருள் வலையமைப்பை முறியடித்து, அதன் விநியோகச் சங்கிலியை தொடக்கத்திலேயே துண்டிப்பதை நோக்கமாகக் கொண்டு இந்த நடவடிக்கை மேற்கொள்ளப்பட்டது.

போதைப்பொருள் கடத்தல் விவகாரத்தில் சகிப்புத்தன்மையற்ற நிலைப்பாட்டை கடைப்பிடிப்பதாக வலியுறுத்திய போலீசார், சமூக நலனைப் பாதுகாக்க போதைப்பொருள் விநியோகத்தை எதிர்த்து தொடர்ந்து போராடி வருவதாக தெரிவித்தனர்.

இது தொடர்பான காவல்துறை அறிக்கையில், இளைஞர்களைப் பாதுகாக்கவும், போதைப்பொருள் இல்லாத அனந்த்நாக் என்ற இலக்கை அடையவும், போதைப்பொருள் வலையமைப்புகளுக்கு எதிராக இதுபோன்ற தீவிர மற்றும் உளவுத்துறை அடிப்படையிலான நடவடிக்கைகளை அனந்த்நாக் போலீசார் தொடர்ந்து மேற்கொள்வார்கள் என்று குறிப்பிடப்பட்டுள்ளது.

இதற்கிடையே, இதனுடன் தொடர்புடைய சாம்பா-லூதியானா நடவடிக்கைகளில் இதுவரை 719 கிராம் ஹெராயின் பறிமுதல் செய்யப்பட்டுள்ளது.

விநியோகம் மற்றும் விற்பனை வலையமைப்பில் ஈடுபட்டுள்ள மேலும் பல நபர்களை அடையாளம் காண போதைப்பொருள் தடுப்பு பிரிவினர் தொடர்ந்து விசாரணை நடத்தி வருகின்றனர்.

Hindusthan Samachar / vidya.b