சென்னை, 13 செப்டம்பர் (ஹி.ச.)

சென்னை தெற்கு மாவட்டம், வேளச்சேரி பகுதி இளைஞர் அணி அமைப்பாளர் தினேஷ் – எலிசபெத் மிஷேல் ஆகியோரின் திருமணம் நடைபெற்றது.

திருமணத்தை கழக இளைஞர் அணிச் செயலாளரும், சட்டப்பேரவை எதிர்க்கட்சித் தலைவருமான உதயநிதி ஸ்டாலின் நடத்தி வைத்து மணமக்களை வாழ்த்தினார்.

விழாவில் பேசிய உதயநிதி ஸ்டாலின், இது காதல் திருமணம் மட்டுமின்றி மதம் மற்றும் மாநிலம் கடந்து நடைபெற்ற திருமணம் எனக் குறிப்பிட்டார்.

பல்வேறு தடைகளைத் தாண்டி பெற்றோர் மற்றும் உறவினர்களின் சம்மதத்துடன் திருமணம் நடைபெற்றுள்ளதாகவும், மணமக்களுக்கு தனது வாழ்த்துகளைத் தெரிவித்துக் கொள்வதாகவும் கூறினார்.

திருமணத்திற்குப் பிறகும் மணமக்கள் ஒருவருக்கொருவர் சிறந்த நண்பர்களாக இருந்து, சுயமரியாதையுடன் விட்டுக்கொடுத்து இணைந்து வாழ வேண்டும் என அவர் அறிவுறுத்தினார்.

மேலும், அவர்களுக்குப் பிறக்கும் குழந்தைகளுக்கு அழகான தமிழ்ப்பெயர்களைச் சூட்ட வேண்டும் என்றும் கேட்டுக்கொண்டார்.

தொடர்ந்து பேசிய அவர், திராவிட முன்னேற்றக் கழகம் 76 ஆண்டுகளை நிறைவு செய்து 77-வது ஆண்டில் அடியெடுத்து வைக்க உள்ளதாகக் குறிப்பிட்டார். தேர்தல் வெற்றி, தோல்விகளுக்கு அப்பாற்பட்டு மக்களோடு நிற்கும் இயக்கமாக திமுக செயல்பட்டு வருவதாகவும் தெரிவித்தார்.

தமிழ்நாட்டில் மின்வெட்டு, சட்டம் ஒழுங்கு மற்றும் விலைவாசி உள்ளிட்ட பல்வேறு பிரச்சினைகள் இருப்பதாகவும், ஆளும் அரசு மீது அவர் விமர்சனங்களை முன்வைத்தார். திமுக ஆட்சியில் செயல்படுத்தப்பட்ட திட்டங்களுக்கு பெயரை மாற்றி தற்போதைய அரசு செயல்படுத்துவதாகவும் அவர் குற்றம்சாட்டினார்.

மேலும், சட்டமன்ற உறுப்பினர்கள் விலைக்கு வாங்கப்பட்டதன் காரணமாகவே இரண்டு தொகுதிகளில் இடைத்தேர்தல் நடைபெற உள்ளதாகக் கூறிய உதயநிதி ஸ்டாலின், இந்த இடைத்தேர்தல் ஆட்சியாளர்களின் வீழ்ச்சிக்கு தொடக்கமாக அமைய வேண்டும் என்றும், திமுகவினர் ஒன்றிணைந்து வெற்றியைப் பெற வேண்டும் என்றும் கேட்டுக்கொண்டார்.

விழாவில் மாவட்டக் கழகச் செயலாளர் மா.சுப்பிரமணியன், முன்னாள் சட்டமன்ற உறுப்பினர் பிரபாகர் ராஜா, மாவட்டப் பொருளாளர் வேளச்சேரி பாஸ்கரன், பகுதிக் கழகச் செயலாளர் ஆனந்தம் உள்ளிட்ட கழக நிர்வாகிகள் மற்றும் முன்னணியினர் பலர் கலந்துகொண்டனர்.

Hindusthan Samachar / GOKILA arumugam