ஈரோடு, 15 செப்டம்பர் (ஹி.ச.)

ஈரோடு மாவட்டம் பவானிசாகர் அணையை ஒட்டியுள்ள வனப்பகுதியில் கடந்த சில வாரங்களாக கடும் வறட்சி நிலவி வருகிறது.

வனத்திற்குள் நீர்நிலைகள் வற்றியும், உணவு கிடைக்காமலும் வனவிலங்குகள் கடும் சிரமத்திற்கு ஆளாகியுள்ளன. இந்த நிலையில் உணவு மற்றும் தண்ணீர் தேடி வனத்தை விட்டு வெளியேறிய கரடி ஒன்று, பவானிசாகர் அணையின் கரையோர பகுதியில் சுற்றித் திரிகிறது.

அணையின் கரையருகே அங்கும் இங்குமாக உலா வந்த அந்த கரடியை கண்டு அப்பகுதி மக்களும், அணைக்கு வந்த சுற்றுலா பயணிகளும் அச்சமடைந்தனர்.

தகவல் அறிந்து அங்கு வந்தவர்கள் கரடியின் நடமாட்டத்தை தூரத்தில் இருந்து பார்த்து சென்றனர்.

சிறிது நேரத்தில் அந்த கரடி அங்கிருந்து நகர்ந்து, அருகில் உள்ள லவ்டேல் காவல் நிலைய வளாகத்திற்குள் புகுந்து உலா வந்தது. காவல் நிலையத்திற்குள் கரடி நுழைந்ததைக் கண்ட காவலர்கள் மற்றும் பொதுமக்கள் அதிர்ச்சி அடைந்தனர்.

இது குறித்து வனத்துறையினருக்கு தகவல் தெரிவிக்கப்பட்டது. விரைந்து வந்த வனத்துறை அதிகாரிகள், பொதுமக்கள் யாரும் கரடியை நெருங்க வேண்டாம் என்றும், அதனை துன்புறுத்த வேண்டாம் என்றும் எச்சரிக்கை விடுத்தனர்.

வறட்சி காரணமாக கரடி உணவு தேடி குடியிருப்பு பகுதிக்கு வந்திருக்கலாம் என்றும், அதனை பாதுகாப்பாக மீண்டும் அடர்ந்த வனப்பகுதிக்குள் விரட்டும் பணியில் ஈடுபட்டு வருவதாகவும் அவர்கள் தெரிவித்தனர்.

மேலும், இரவு நேரங்களில் தனியாக நடமாட வேண்டாம் எனவும், வனப்பகுதியை ஒட்டியுள்ள கிராம மக்கள் எச்சரிக்கையுடன் இருக்க வேண்டும் எனவும் அறிவுறுத்தப்பட்டுள்ளது.

Hindusthan Samachar / vidya.b