ராஜஸ்தான், 15 செப்டம்பர் (ஹி.ச.)

ராஜஸ்தான் மாநிலத்தில் ஜெய்ப்பூர், ஜோத்பூர், கோட்டா மாநகராட்சிகள் மற்றும் சுகேத் நகராட்சி நீங்கலாக 305 நகர உள்ளாட்சி அமைப்புகளுக்கான தலைவர் தேர்தலுக்கான பொது அறிவிப்பை மாநில தேர்தல் ஆணையம் இன்று காலை 7 மணிக்கு வெளியிட்டுள்ளது.

ஏற்கனவே அறிவிக்கப்பட்ட அட்டவணையின்படி இந்த தேர்தல்கள் செப்டம்பர் 21 மற்றும் 22-ம் தேதிகளில் நடைபெறும் என தெரிவிக்கப்பட்டுள்ளது.

தலைவர் தேர்தல் ஒத்திவைக்கப்பட்ட நான்கு நகர உள்ளாட்சிகளில் உள்ள 10 வாக்குச்சாவடிகளில் வரும் செப்டம்பர் 16-ம் தேதி மறுவாக்குப்பதிவு நடத்தப்படும் எனவும், இதற்கான வாக்கு எண்ணிக்கை செப்டம்பர் 17-ம் தேதி நடைபெறும் எனவும் அறிவிக்கப்பட்டுள்ளது.

இந்த மறுவாக்குப்பதிவுக்கு பிறகு அந்த நான்கு அமைப்புகளுக்கான தலைவர் தேர்தலுக்கான பொது அறிவிப்பு வெளியிடப்படும்.

இதனிடையே, நேற்று நடைபெற்ற ராஜஸ்தான் நகர உள்ளாட்சித் தேர்தலில் பாரதிய ஜனதா கட்சி குறிப்பிடத்தக்க வெற்றியைப் பெற்றுள்ளது. ஜெய்ப்பூர் மாநகராட்சி வாரியத்தில் 78 இடங்களை பாஜக கைப்பற்றியுள்ளது.

எந்தவொரு கட்சிக்கும் தனிப்பெரும்பான்மை கிடைக்காத பல நகராட்சிகளில் சுயேச்சை வேட்பாளர்கள் செல்வாக்கு செலுத்தி வருகின்றனர்.

ஜெய்ப்பூர் மாநகராட்சியில் உள்ள 150 வார்டுகளில் 146 வார்டுகளுக்கான முடிவுகள் அறிவிக்கப்பட்டுள்ளன. இதில் பாஜக 78 வார்டுகளிலும், இந்திய தேசிய காங்கிரஸ் 53 வார்டுகளிலும், சுயேச்சைகள் 15 வார்டுகளிலும் வெற்றி பெற்றுள்ளனர்.

மின்னணு வாக்குப்பதிவு இயந்திரங்களில் ஏற்பட்ட தொழில்நுட்பக் கோளாறு காரணமாக ஐந்து வாக்குச்சாவடிகளில் மறுவாக்குப்பதிவு தேவைப்படுவதால், மீதமுள்ள நான்கு வார்டுகளுக்கான முடிவுகள் அதன் பிறகே தீர்மானிக்கப்படும்.

வார்டு 9-ல் உள்ள வாக்குச்சாவடி எண் 111, வார்டு 18-ல் வாக்குச்சாவடி எண் 235, வார்டு 25-ல் வாக்குச்சாவடி எண் 343 மற்றும் வார்டு 34-ல் வாக்குச்சாவடி எண்கள் 477 மற்றும் 484 ஆகியவற்றில் மின்னணு வாக்குப்பதிவு இயந்திரங்களின் முடிவுகளை மீட்க முடியவில்லை என ஜெய்ப்பூர் மாவட்ட ஆட்சியர் சந்தேஷ் நாயக் தெரிவித்துள்ளார்.

ராஜஸ்தான் முழுவதும் பத்து மாநகராட்சிகளில் எட்டு மாநகராட்சிகளில் வாக்கு எண்ணிக்கை நிறைவடைந்துள்ளது. ஜெய்ப்பூர், கோட்டா, உதய்பூர் மற்றும் பில்வாரா ஆகிய இடங்களில் பாஜக ஆட்சியை அமைக்க உள்ள நிலையில், பிகானிர் மாநகராட்சியில் காங்கிரஸ் தனிப்பெரும்பான்மையுடன் வெற்றி பெற்றுள்ளது.

Hindusthan Samachar / vidya.b