சென்னை, 16 செப்டம்பர் (ஹி.ச.)

அத்திப்பழ விவசாயம் என்பது குறைந்த செலவில் அதிக லாபம் தரக்கூடிய ஒரு சிறந்த வணிக ரீதியான விவசாயமாகும். அத்திப்பழம் அதன் சுவைக்காகவும், மருத்துவக் குணங்களுக்காகவும் உலகளவில் மிகவும் பிரபலமானது.

தமிழகத்தில் இதன் தேவை நாளுக்கு நாள் அதிகரித்து வருவதால், விவசாயிகள் இதனை ஒரு முக்கியப் பயிராக பயிரிடத் தொடங்கியுள்ளனர்.

மண்ணும் தட்பவெப்ப நிலையும்மண் வகை:

நல்ல வடிகால் வசதியுள்ள செம்மண், கரிசல் மண் மற்றும் மணற்பாங்கான வண்டல் மண் இதற்கு மிகவும் ஏற்றது. மண்ணின் pH அளவு 6.0 முதல் 8.0 வரை இருக்க வேண்டும்.

தட்பவெப்ப நிலை:

அத்தி வறட்சியைத் தாங்கி வளரக்கூடிய ஒரு வெப்பமண்டலப் பயிராகும். மிதமான வெயிலும், குறைந்த பனிப்பொழிவும் உள்ள பகுதிகள் இதன் வளர்ச்சிக்கு உகந்தது

ரகங்கள் மற்றும் நடவு முறை

பூனா, பெங்களூரு, டிங்கர் மற்றும் டயானா போன்ற ரகங்கள் வணிக ரீதியான சாகுபடிக்கு ஏற்றவை.

நிலத்தை 2 அல்லது 3 முறை நன்றாக உழுது, 2-க்கு 2 அடி என்ற அளவில் குழிகள் எடுக்க வேண்டும். செடிக்குச் செடி மற்றும் வரிசைக்கு வரிசை 10-க்கு 10 அடி அல்லது 12-க்கு 12 அடி இடைவெளி விட்டு நடவு செய்வது நல்லது. குழிகளில் தொழு உரம், வேப்பம் புண்ணாக்கு ஆகியவற்றை இட்டு செடிகளை நட வேண்டும்.

நீர்ப்பாசனம்:

அத்திப்பழத்திற்கு மிதமான தண்ணீரே போதுமானது. சொட்டுநீர்ப் பாசனம் (Drip Irrigation) அமைப்பது தண்ணீரைச் சேமிக்கவும், செடியின் சீரான வளர்ச்சிக்கும் உதவும். கோடைக் காலத்தில் 4-5 நாட்களுக்கு ஒருமுறையும், குளிர் காலத்தில் 10 நாட்களுக்கு ஒருமுறையும் நீர் பாய்ச்சினால் போதும்.

உரங்கள்:

ஆண்டுக்கு இருமுறை (ஜனவரி மற்றும் ஆகஸ்ட் மாதங்களில்) மரத்திற்கு 10-15 கிலோ மக்கிய தொழு உரம் மற்றும் தேவையான தழை, மணி, சாம்பல் சத்துக்களை அளிக்க வேண்டும்.

கவாத்து செய்தல்

அத்தி விவசாயத்தில் கவாத்து செய்தல் மிக முக்கியமான தொழில்நுட்பமாகும். மரத்தின் தேவையற்ற கிளைகளை வெட்டிவிடுவதன் மூலம் சூரிய ஒளி அனைத்துப் பகுதிகளிலும் பட்டு, அதிக பக்கவாட்டுக் கிளைகள் உருவாகும். இது பழங்களின் எண்ணிக்கையையும் தரத்தையும் அதிகரிக்கும்.

அறுவடை மற்றும் மகசூல்

நடவு செய்த 8 முதல் 10 மாதங்களில் அத்தி மரம் காய்க்கத் தொடங்கும்.பழங்கள் பச்சை நிறத்திலிருந்து லேசான மஞ்சள் அல்லது ஊதா நிறமாக மாறும்போது அறுவடை செய்ய வேண்டும்.ஒரு நன்கு வளர்ந்த மரத்திலிருந்து ஆண்டுக்குச் சராசரியாக 15 முதல் 25 கிலோ வரை பழங்கள் கிடைக்கும்.

பொருளாதார லாபம் மற்றும் சந்தை வாய்ப்பு

அத்திப்பழங்களை நேரடியாகப் பழங்களாகவோ அல்லது காயவைத்து உலர்ந்த அத்திப்பழங்களாகவோ (Dry Figs) விற்பனை செய்யலாம். உலர்ந்த பழங்களுக்குச் சந்தையில் எப்போதும் அதிக விலையும் நிலையான தேவையும் உள்ளது. சரியான முறையில் பராமரித்தால், அத்தி விவசாயத்தின் மூலம் ஒரு ஏக்கருக்கு ஆண்டுக்கு பல லட்ச ரூபாய் வரை நிலையான வருமானம் ஈட்ட முடியும்.

Hindusthan Samachar / vidya.b