டேராடூன், 18 செப்டம்பர் (ஹி.ச.)

நேபாளத்தில் ஏற்பட்ட இயற்கை பேரிடரால் பாதிக்கப்பட்டவர்களுக்கு அத்தியாவசிய நிவாரணப் பொருட்கள் அடங்கிய வாகனங்களை உத்தராகண்ட் முதல்வர் புஷ்கர் சிங் தாமி இன்று கொடியசைத்து அனுப்பி வைத்தார்.

டேராடூனில் உள்ள முதல்வரின் முகாம் அலுவலகத்தில் இருந்து புறப்பட்ட இந்த வாகனங்கள், அண்டை நாட்டில் ஏற்பட்ட கடும் வெள்ளப்பெருக்கின் பின்விளைவுகளை சமாளிக்கும் குடும்பங்களுக்கு உதவும் வகையில் முக்கிய பொருட்களை கொண்டு செல்கின்றன.

நேபாளத்தின் தேசிய பேரிடர் அபாயக் குறைப்பு மற்றும் மேலாண்மை ஆணையத்தின் (NDRRMA) சமீபத்திய அறிக்கையின்படி, வெள்ளப்பெருக்கில் உயிரிழந்தோர் எண்ணிக்கை 1,410 ஆக உயர்ந்துள்ளது.

மேலும் 6,145 பேர் இன்னும் காணாமல் போயுள்ளனர். பாதிக்கப்பட்ட மாவட்டங்களில் மீட்பு, நிவாரணம் மற்றும் சீரமைப்பு பணிகள் தொடர்ந்து நடைபெற்று வருகின்றன.

வியாழக்கிழமை வெளியான NDRRMA அறிக்கையில், உயிரிழந்தவர்களில் 549 பேர் ஆண்கள், 336 பேர் பெண்கள் மற்றும் 525 பேர் அடையாளம் காணப்படாதவர்கள் என தெரிவிக்கப்பட்டுள்ளது.

அதிக உயிரிழப்பு ஏற்பட்ட மாவட்டமாக சித்வான் உள்ளது, அங்கு 364 பேர் உயிரிழந்துள்ளனர்.

அதனைத் தொடர்ந்து கிழக்கு நவல்பராசியில் 232 பேரும், மேற்கு நவல்பராசியில் 222 பேரும், நுவாகோட்டில் 203 பேரும், ரசுவாவில் 199 பேரும் உயிரிழந்துள்ளனர்.

இந்த பேரிடர் காரணமாக ஆயிரக்கணக்கானோர் இடம்பெயர்ந்துள்ளனர். இதுவரை 13,756 பேர் மீட்கப்பட்டுள்ளனர்.

தற்போது 19 மருத்துவமனைகளில் 344 பேர் சிகிச்சை பெற்று வருகின்றனர், 290 பேர் சிகிச்சை முடிந்து வீடு திரும்பியுள்ளனர்.

பாதுகாப்பு அமைப்புகள் 9,820 பேருக்கு மருத்துவ சிகிச்சை அளித்துள்ளன.

Hindusthan Samachar / vidya.b